कोंकणी आरती

भांगरभूंय | प्रतिनिधी

आरत गणपतीची

जय देवा जय देवा जय गणपतीराया
शरण तुज्या पांयार, आसूं आमचेर माया

रुप तुजें गोड नांव धीरदीणें
संसाराची वाट खर तुज्याविणें
तुज्या दर्शनान सुखी आमचें जिणें
बुध्दीची वाडून धार मन जाता शाणें
जय देवा जय देवा जय गणपतीराया
शरण तुज्या पांया आसूं आमचेर माया

संकट दुख्खाचें तुवें परतुचें
घन मोठें सुखाचें तुवें शिपडावचें
सासायेंत तुजे व्हड आमी जावचे
तुजे गुण गायतना मन आमचें फुलचें
जय देवा जय देवा जय गणपतीराया
शरण तुज्या पांया आसूं आमचेर माया

रचना – उदय भेंब्रे

आरत चंद्रेश्वराची

जय देवा जय देवा जय चंद्रेश्वरा
पर्वतावेल्या भुतनाथा शंकरा

कपलार चंद्र आनी सर्प गळ्यात
दर्शन तुमी दिलें दसर्‍याच्या भारांत
दी गा देवा कौल श्री परमेश्वरा
ग्रामदेवा पाड्डेच्या राखणदारा
जय देवा जय देवा जय चंद्रेश्वरा
पर्वतावेल्या भुतनाथा शंकरा

सगल्यांची देवा तू राखण गा करता
दर्शनान तुमच्या तनमन तृप्त जाता
पांयार घालुन घेतां हे रुद्रेश्वरा
कृपादृश्टी दवर गा नटेश्वरा
जय देवा जय देवा जय चंद्रेश्वरा
पर्वतावेल्या भुतनाथा शंकरा

रचना-दिलीप नायक (दिना)

आरत श्री स्वामी समर्थांची

जय देवा श्री स्वामी समर्थ राया
भक्ती भावान तुमची आरत ही गावया

आवयचें रुप तुमचें बापायची माया
दर्शनाक तुमच्या आतुरल्या ही काया
मनांसावन पडटा हांव तुमकांगा पांयां
नित्य आसूं आमचेर तुमची सासाय सया
जय देवा श्री स्वामी समर्थ राया
भक्ती भावान तुमची आरत ही गावया

अवतरले तुमी कर्दळीच्या रानां
दर्शनान तुमच्या तृप्त जालीं मनां
तूंच एक शक्त संवसार-गणा
विनाश पापांचो कोण करी तुजेविणा
तुमचे भेटेंत हीच काशी आनी गया
नांव तुमचें ओठांर नित्य घोळोवया

जय देवा श्री स्वामी समर्थ राया
भक्ती भावान तुमची आरत ही गावया

चवथे अवतार तुमी दत्तात्रयाचे
तूंमीच आदार सगळ्या भक्तगणांचे
आसचे वाट दाखोवंक सदांच तूंमी मुखार
ही मनाकाळजांतली आरत देवा स्विकार
पोशांतल्यान तुमच्या सोडची आमचेर दया
रिगचो काळजांत तुमचो सासायेचो दर्या
जय देवा श्री स्वामी समर्थ राया
भक्ती भावान तुमची आरत ही गावया
रचना- दिलीप नायक(दिना)

नागेशाची आरत

आरत महारुद्रा .. बांदोडेच्या नागेशा आरत महारुद्रा.

स्वारी तुमची घोड्यार हातांत ढाल आनी तलवार
तेजस्वी रुप तुमचें शिवरुपी अवतारा
आरत महारुद्रा बांदोडेच्या नागेशा आरत महारुद्रा…

गाभ्यार्‍यांतलें दर्शन तुमचें तनामनाक दीता धीटाय
दर्शनाक भक्तांचो दर्यो येता दरएक सोमारा
आरत महारुद्रा बांदोडेच्या नागेशा आरत महारुद्रा…

घाराणे तुमच्या पांयार तुमचो हाथ आसुं माथ्यार
गोंयकारांचे तुमी आधार नमन आमचें स्वीकारा
आरत महारुद्रा बांदोडेच्या नागेशा आरत महारुद्रा…
रचना..दिलीप नायक (दिना)