भांगरभूंय | प्रतिनिधी
पणजी : जनगणना २०२७ ची तयारी म्हणून देशभरांतल्या विवीध राज्यांनी पुर्व तपासणी घेतले. ते प्रमाण गोंयच्या गांवगिर्या वाठारांतल्या पेडणेंच्या कोरगांव गांवाची, जाल्यार शार वाठारा खातीर मडगांवच्या प्रभाग १६ ची निवड केल्या. घरांची वळेरी आनी घरांच्या आंकड्याचे गणनेची (एचएलओ) ही पूर्व-तपासणी ऑक्टोबर-नोव्हेंबर २०२५ मजगतीं जातली. हे जनगणने खातीर शिक्षक आनी शासकीय कर्मचार्यांचेर जापसालदारकी निश्चीत करतले.
पूर्व- तपासणेंत जनगणने विशीं सगल्या पैलुंचो आसपाव आसा. जनगणनेंतल्या प्रस्तावीत प्रस्नांचेंे मुल्यांकन, डेटा संकलन पद्धती, प्रशिक्षण प्रभावीपणा, लॉजिस्टिक्स, छपाई प्रक्रिया, डेटा गुणवत्ता मुल्यांकन, येवपी फील्ड समस्या वळखप ह्या सगल्यांची पुर्व तपासणी करतले. डेटा संकलना खातीर पयलेच फावट मोबायल ऍप वापरतले. पूर्व-चाचणी मजगतीं स्व-गणना, डिजिटल मॅपींग साधप आनी रिअल-टायम देखरेख आनी वेवस्थापना खातीर वेब-आधारीत पोर्टलाचीय तपासणी करतले.
पुर्व-तपासणी ही तालीम आशिल्ल्यान, शिक्षक, सरकारी, निमशासकीय अधिकार्यांक जनगणना प्रवर्तक आनी
पर्यवेक्षक म्हणून, जाल्यार तहसीलदार, बी.डी.ओ., मामलेदार, महानगरपालिका आयुक्त, कार्यकारी अधिकारी हेरांक प्रभारी अधिकारी म्हणून वांटेकार करून घेवचें पडटा. पुर्व-तपासणेंतल्यो २५-५०% प्रवर्तक बायलो आसच्यो, असो प्रस्ताव आसा.
राज्यांतले जनगणना संचालक हे नोडल अधिकारी म्हणून काम पळयतले. तशेंच पुर्व-तपासणे खातीर नेमके कितल्या कर्मचार्यांची गरज आसा, हाची म्हायती दितले.
लोकसंख्या गणना फेब्रुवारी २०२७ वर्सा
केंद्रान जनगणना २०२७ ची अधिसुचवणी पपयलींच जारी केल्यात. राज्याचे वेवस्थे प्रमाण घरांची वळेरी आनी गृहनिर्माण गणना (टप्पो-१) एप्रील-सप्टेंबर २०२६ ह्या काळांत एका म्हयन्या भितर करतले. जाल्यार लोकसंख्या गणना (टप्पो-२) फेब्रुवारी २०२७ वर्सा करतले.
वेतन आनी मानधन मेळटलें. पूर्व-तपासणेंत जनगणनेच्या कामा खातीर तैनात केल्ल्या अधिकार्यांक तांच्या प्रशिक्षण काळा सयत ’ऑन ड्युटी’ मानतले. तांचें वेतन तांच्या खात्या कडल्यान दितले. ह्या कामा खातीर तैनात केल्ल्या सगल्या राज्य सरकारी अधिकार्यांक मानधनूय दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
