भांगरभूंय | प्रतिनिधी
पेडणें: प्रदूशण नियंत्रण मंडळाच्या आदेशा प्रमाण पेडणें मामलेदार आनी उपजिल्हलोधिकारी कार्यालया वतीन आगरवाड्यावेल्या गणेश मुर्ती विकपी दुकानाक कुलूप घाल्लें. अशें आसून लेगीत काल रातीं उसरां ह्या दुकानांतल्यान श्री गणेश मुर्ती रिक्षेंतल्यान व्हेल्ल्याचें उक्तें जालें. हाका लागून प्रदुशण नियंत्रण बोर्डाची पीओपीच्या मुर्तींचेर केल्ली कारवाय फकत दोळ्यांक उदक लावंक आशिल्ल्याचें पर्यावरण मोगींनी प्रतिक्रिया उक्तायतना सांगलें.
सोमारा संतोष गडेकार, तलाठी लतेश वायंगणकार, कारकून भूषण नायक हांणी दुकान धनयाचे हाजेरींत पीओपी गणेश मूर्तींची तपासणी करून दुकान सील केल्लें. ताचे उपरांत रातीं उसरां ह्या दुकानांतल्यो मुर्ती दुसरे वटेन भायर काडून दुसरे कडेन दिल्यो. मंगळारा दिसभर ह्या आस्थापनांतल्यो पीओपी गणेश मुर्ती व्हरपाचें काम चालूच आशिल्लें. हाका लागून पीओपीच्या मुर्तींचेर बंदी आसुनय त्यो विक्रे खातीर दवरिल्ल्यो असो दुबाव आसा. फाटल्या म्हयन्या सावन हें दुकान चालूच आशिल्लें. प्रदुशण नियंत्रण मंडळाच्या आदेशा प्रमाण ह्या दुकानाचेर कारवाय जरी केल्या तरी तांतल्यो मुर्ती सीलबंद करूनय त्यो हालयिल्ल्यान हे कारवाये विशीं नागरिकां मदीं चर्चा चालूच आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
