भांगरभूंय | प्रतिनिधी
म्हापशें : चिखले, कोलवाळेचे फाटल्या चार दिसां सावन नळ सुकल्यात. चवथीच्या वेळार उदकाक लागून लोकांचे बरेच हाल जाल्यात. कोलवाळे स्वयंभू मठा लागसार उदकाच्या पायपांक गळटी लागिल्ली. पेयजल पुरवण खात्यान शुक्रारा, २२ ऑगस्टाक उदकाचीं पायपां सारकीं करपाचें काम हातांत घेतलें. हीं पायपां सारकीं जाल्यात. मात चिखले गांवाक उदकाची पुरवण करपी जलकुंभांत उदक येवप बंद जालां. हाचो परिणाम गांवांत उदक येवप बंद जालां. फाटल्या चार दिसां सावन नळाक उदक येनाशिल्ल्यान लोकां उदका खातीर टँकराची वेवस्था करची पडटा.
चवथीच्या काळांत उदकाक लागून हाल
परबांच्या काळांतूच नळांक उदक येवपाचें बंद जाल्ल्यान गांवांतल्या सुमार २०० घरांक हाचो फटको बसलो. सध्या लोक उदक केन्ना येतलें हाची वाट पळयतात. गांवांतली उदकाची पुरवण बंद जाल्ल्यान आमी पिवपाचें उदक खात्याच्या अधिकार्यां कडेन संपर्क करून समस्या सोडोवपाचो उलो मारला, अशें सरपंच दशरथ बिचोलकार हांणी सांगलें. नळांक उदक नाशिल्ल्यान लोकांचे हाल जाल्यात. फाल्यां चवथ आनी उदक नाशिल्ल्यान लोकांचे हाल जाल्यात. ह्या काळांत उदकाची गरज लक्षात घेवन खात्यान ही समस्या बेगोबेग सोडोवची अशी मागणी तांणी केली.
उदकाच्या पायपांतले ब्लॉक सोदपाचें काम सुरू आसा. दनपार मेरेन हें काम पुराय जावन उदकाची पुरवण सुरळीत करतले, अशी म्हायती अधिकार्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
