भांगरभूंय | प्रतिनिधी
पणजीः फाटलीं पांच वर्सां मुरगांव बंदराचेर गंभीर अपघात जावन मरण येवपाच्यो तीन घडणुको घडल्यात. सगळ्यांत उणे अपघाती मरण जावपाच्या प्रमाणांत गोंयचो मुरगांब बंदर ह्या देशांतल्या हेर बंदराचे तुळेंत दुसरे वळेरेंत आसा, अशी म्हायती केंद्रीय बंदर, जहाज बांदणी आनी जलमार्ग मंत्रालयान दिल्या.
हे विशीं अदीक म्हायती दितना मंत्रालयान सांगलें, बंदरांत काम करपी कामगारांचें नियमीत वेवसायीक भलायकी तपासणी आनी सुरक्षा प्रशिक्षण सक्तीचें केलां. तशेंच वर्स २०२४-२५सात मंत्रालयाकडे बाबत कामाची परिस्थिती तशेंच सुरक्षा नेम मोडिल्ले विशींचो कसलोच अहवाल येवंक ना.
मात फाटल्या पांच वर्सांत गोंयच्या मुरगांव बंदर प्राधिकरणाच्या बंदरांत कामगारांक मरण येवपी तीन अपघाती घडणुको घडल्यात. देशांतल्या १२ मुखेल बंदरा मदलो मुरगांव बंदर हो कमी अपघाती मरण जावपाचे वळेरेंत कामराजार बंदरा सयत दुसर्या वळेरेर आसा. जाल्यार पयले वळेरेर जवाहरलाल नेहरू बंदर आनी व्ही. ओ. चिदंबर्नार बंदर आसा जंय एकूय मरण येवपी अपघातांची नोंद जावंक ना.
यंत्रणां सुदारवपा खातीर तशेंच मनीस बळाचो वापरांत धोको कमी करपा खातीर मुखेल बंदरांनी खुबशीं पावलां उबारल्यांत. जातूंत बर्थात माक्ना बसोवप, कार्गो खातीर कन्वेयर यंत्रणां बसोवप, मोबायल बंदर कार्गो, टायर आशिल्ले गेन्ट्री क्रेन, स्वयंचलीत म्हाल हातळपी माक्ना हे सारिकिल्लीं आधुनिक कार्गो हाताळपी यंत्रणां बसयल्यांत.
ते भायर डॉकाचेर तैनात आशिल्ल्या कर्मचार्यांची सुरक्षा सुनिश्चीत करपा खातीर नियमीत प्रशिक्षण दिवन तांचे खातीर जागृताय कार्यावळी घडोवन हाडटात आनी योग्य भशेन तांकां वैयक्तीक सुरक्षा यंत्रणां दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
