भांगरभूंय | प्रतिनिधी
पणजीः चवथीचे फाटभूंयेर गर्दी टाळपाक ओ कोकेरो सावन राष्ट्रीय महामार्ग तात्पुरतो उक्तो दवरला. फ्लायओव्हराच्या कामा खातीर मॉल दे गोवा ते हाॅटेल ओरीयन मजगतींचो एक वटेनचो रस्तो बंद दवरुन पणजे वचपी येरादारी पीडीए कॉलनी वटेनच्यान घुंवडावपाचो निर्णय जाल्लो. पूण गाडयांची गर्दी पळोवन तो निर्णय फाटीं घेतला. आतां चवथी उपरांत नेमकें कितें करपाचें तें थारायतले.
फ्लायओव्हराचे डॅक बसोवपाच्या कामा वेळार लोकांचे तशेंच गाडयांचे सुरक्षे खातीर बांदकाम खात्यान पर्वरे मॉल दे गोवा ते ओ कोकेरो मजगतींचो म्हामार्ग म्हापशें सावन पणजे वचपी येरादारी खातीर बंद दवरपाचो आदेश काडिल्लो.
पर्यटन मंत्री रोहन खंवटे हांणी सद्याच्या चवथीच्या काळांत म्हामार्ग बंद दवरल्यार लोकांक आनीक त्रास जातले, असो भंय उक्तायिल्लो. चवथीचे दीस चलतात आनी ह्या दिसांनी म्हामार्ग आनी पर्वरचे भितरले रस्ते सामकेच व्यस्त आसतात. देखून पर्वरे वाठारांत गर्दी जावन बोवाळ जातलो म्हूण म्हामार्ग बंद दवरपाचो निर्णय फाटी घेवचो अशी मागणी गाडयेकारांनी केल्ली.
हे मागणेची दखल घेत बांदकाम खात्यान नियोजनांत बदल केला. फकत हॉटेल ओरीयन ते मॉल दे गोवा मेरेनचो रस्तो बंद दवरून येरादारीक पर्यायी वेवस्था केल्या. मजगतीं, सुटयेच्या दिसा वा रातच्या वेळार 120 टन वजनाचे डॅक बसोवचे. सकाळीं 8 ते 10 आनी सांजवेळा 5 ते 8 मेरेन येरादारीक आडखळ जातली अशें काम करचें न्हय, अशी मागणी गाडयेकारांनी केल्या.
मार्ग सध्या तरी बंद ना
मजगतीं, पर्वरेचो म्हामार्ग चवथीच्या काळात बंद करचे नात अशे मुख्यमंत्री तशेच बांदकाम मंत्री डॉ. प्रमोद सावंत हांणी सांगलें.
चवथ जाले उपरांत पाच दिसांनी येरादारीचें योग्य नियोजन केले उपरांतूच हे विशींचो निर्णय घेतले. दोन दिसा भितर राज्यांतल्या रस्त्यांचेर पडिल्लीं फोंडकुलां भरतले, अशीय म्हायती मुख्यमंत्र्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
