भांगरभूंय | प्रतिनिधी
पणजी: पणजेच्या आझाद मैदानांत व्हडा संख्येन जनावर मोगी आनी खास करून सुण्यां मोगींचे व्हड गर्देन एका आवाजांत आयज सर्वोच्च न्यायालयाचे उपकार मानले.
गोवा एनिमल फेडरेशनान आयतारा हांगच्या आझाद मैदानांत एक मेळावो घेतलो आनी गोंय सरकारान सामुहीक सुण्यांचें निर्बीजीकरण आनी लसीकरण नेटान आनी बेगोबेग सुरू करचें अशी एकमतान मागणी केली.
ह्या मेळाव्याक शेकड्यांनी संबंदीत नागरीक आनी जनावर मोगी हजर आशिल्ले.
एडवोकेट नोर्मा आल्वारीस, हेमा सरदेसाय, के.डी. रो, प्रकाश कामत, डेक्सटर ब्रागांझा, फिडोली परेरा, तशेंच जीएएफ वांगडी आनी हेरांनी सर्वोच्च न्यायालयान हेडग्या सुण्यांचे समस्येचो घुस्पागोंदळ सोडोवपा खातीर दिल्ल्या मनीसपणाच्या, शास्त्रीय आनी वेव्हारीक सुदारीत आदेशा खातीर उपकार मानले.
गोंयांत १५ हजार सुण्यांक/वर्साक निर्बीजीकरण करपाची सद्याची तांक आसा जीं खाजगी एनजीओ करतात. गोंयांत सुण्यांचो आंकडो नियंत्रीत करपा खातीर ५०,००० सुण्यांक/वर्साक निर्बिजीकरण करपाची गरज आशिल्ल्यान, ३ वर्सां भितर ८०- ९०% निर्बिजीकरण दर मेळोवपा खातीर, अतिरिक्त निर्बिजीकरण तांक तयार करपा खातीर वेगान सरकारान मोहीम हातांत घेवची अशी मागणी जीएएफान केली. हाका लागून ५-६ वर्सां भितर सैमीक जिवीत कागाळेक लागून व्हडा प्रमाणांत समुदाय सुण्यांची संख्या उणी जातली.
तशेंच जीएएफान गोंयांत उण्यांत उणे दोन इंसिनेटर जनावरांच्या कुडींचो विलो लावपा खातीर उपलब्ध करपाची मागणी केल्या आनी सरकारान हेडग्या जनावरांक २४द७ एम्ब्युलन्स आनी क्लिनीक सुरू करपाचें उतर पाळचें अशी मागणी केल्या.
राज्यभरांतल्या मुखेल पशुकल्याण एनजीओचो आस्पाव आशिल्लो गोंय पशुसंघ, सर्वोच्च न्यायालयाच्या सुदारीत आदेशांत सांगिल्ले प्रमाण ह्या विशयांत गोंय कायदेशीर, शास्त्रीय आनी मनीसपणाच्या मार्गान चलचो हाची खात्री करपाक एकवटान उबो रावतलो.
भौशीक सुरक्षेची राखण करतनाच सुण्यांची वाडपी संख्या टिकावू पद्दतीन उणी करपाक वावुरता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
