भांगरभूंय | प्रतिनिधी
चित्रपट कलेंतल्या विवीध कुशळटाये खातीर दिशादर्शक
भांगरभूंय । खबरां मेज
पणजी : गोंयच्या कला- संस्कृती मळा खातीर आयचो दीस अभिमानाचो आनी खोशयेच थारलो. गोंयचें भोवआयामी व्यक्तीमत्व चित्रपट दिग्दर्शक, फोटोग्राफर, नाटककार आनी लेखक साईनाथ राजाराम परब हांणी बरयिल्ल्या ‘डीआयवाय (डू इट युवरसेल्फ) फिल्ममेकींग : अ टूलकीट फॉर डिजिटल फिल्ममेकर्स’ ह्या पुस्तकाचें लोकार्पण मुख्यमंत्री डॉ. प्रमोद सावंत हांचे हस्तुकीं जालें.
ह्या सुवाळ्याक प्रमोद आचार्य (संपादकीय संचालक, प्रुडंट मिडिया), अॅड. यतीश नायक, संकल्प परब आनी पुस्तक प्रकाशक विद्या शिकेरकार घैसास हाजीर आशिल्ले.
ह्या पुस्तकाचे प्रस्तावनेंत आयएएस अधिकारी प्रसाद लोलयेंकार हांणी ह्या पुस्तकाक ‘चित्रपट निर्मिती खातीरचो दिशादर्शक’ अशें म्हणलां. जाल्यार नामनेचे मराठी चित्रपट दिग्दर्शक संदीप सावंत हांणीय हें पुस्तक स्वतंत्र चित्रपटसृश्टी खातीर आनी नवें पिळगीच्या कथाकारां खातीर खुबूच फायद्याचें थारतलें, अशें म्हणलां.
ह्या विशया वयलें हें पयलेंच पुस्तक. तें राष्ट्रीय शिक्षणीक धोरण (एनईपी) अभ्यासक्रमांत आस्पावीत आशिल्ल्या चित्रपट कलेंतल्या विवीध कुशळटाये खातीर विद्यार्थ्यांक आनी शिक्षकांक उपेगी थारतलें.
डीआयवाय फिल्ममेकींग हें पुस्तक फकत तंत्रीक म्हायती दिना, जाल्यार तातूंत साईनाथ परब हांची गोंयचे मातयेंतली संवेदनशीलता, अणभव आनी कथाकथना वयलो निस्सीम मोग लेगीत वाचकां मुखार येता. ताका लागून हें पुस्तक विद्यार्थ्या पसून ते नवोदीत चित्रपट निर्माते आनी रसिकां मेरेन सगल्यां खातीर प्रेरणादायी थारतलें. हो लोकार्पण सुवाळो फक्त एका लेखाच्या येसाचो खीण ना, जाल्यार गोंयच्या सर्जनशील प्रवासांतलो एक म्हत्वाचो पांवडो आसा हें विशेश, अशें उजवाडायिल्ल्या पत्रकांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
