भांगरभूंय | प्रतिनिधी
पणजी : चवथीक लागून नाल्लांची मागणी वाडिल्ल्यान फलोत्पादन म्हामंडळ फाल्यां आनीक 25 हजार नाल्ल हाडटलें. दोन खेपो हाडिल्ले 50 हजार नाल्ल दिसा भितर खपिल्ल्याची म्हायती म्हामंडळाचे वेवस्थापकी संचालक चंद्रहास देसाय हांणी दिली.
राज्यांत पीक सामके उणें आयिल्ल्यान नाल्ल बरोच म्हारग जाला. बाजारात 60 ते 100 रूपया अशें नाल्लाचें मोल आसा. हे फांटभुयेर कर्नाटकांतल्यान नाल्ल हाडून तो लोकांक सवाय दरात उपलब्ध करपाचो उपक्रम म्हामंडळान चालू केला.
आता मेरेन दोन खेपो वट्ट 50 हजार नाल्ल आमी कर्नाटकातल्यान हाडलें. फाल्या सोमारा 25 हजार नाल्लांची रास पावपाची आसा. 43 वा 45 रूपया एक अशें दरान म्हामंडळाच्या गाळ्यांचेर नाल्लाची विक्री जातली. आमका नाल 38 रूपया पडलो जाल्यार 43 रूपयान विकतले आनी 40 रूपया पडलो जाल्यार 45 रूपयान विकतले. गाळेधारकाक गिरायका कडल्यान 5 रूपया फायदो मेळटा. फलोत्पादन म्हामंडळ मात, ना फायदो ना लुकसाण तत्वाचेर नाल्लाची विक्री करता, अशें श्री. देसाय हांणी सांगलें.
पयली खेपो आमका 40 रूपयान नाल्ल मेळ्ळो आनी दुसरे खेपो 38 रूपयान मेळ्ळो. तातल्या तातूंत कर्नाटकान नाल्ल सवाय आसा. केरळात नाल्ल सवाय आसलो तरी येरादारीचो खर्च वाडटलो. हाका लागून म्हामंडळ कर्नाटकातल्यान नाल्ल खरेदी करता, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
