भांगरभूंय | प्रतिनिधी
म्हापशें ः सिकेरीच्या आग्वाद किल्ल्या कडेन आशिल्ल्या सेंट लॉरेन्स चर्चीक शॉर्ट सर्कीटाक लागून उजो लागलो. ह्या उज्यांत धर्मगुरूंच्या रावपाचे कुडीं सयत गुदावांतल्यो पुर्वील्ल्यो वस्तू आनी पांख्याचें लाकडू जळिल्ल्यान सुमार ८० लाख रूपयांचें लुकसाण जालें. ही इगर्ज सुमार ३०० वर्सां आदली.
ही घडणूक आयज २४ तारखेर सकाळीं सुमार ५.३० वरांचेर घडली. चर्चींतले फा. फ्रेन्की, फा. टोनी आनी फा. कार्दोज ह्या तीन धर्मगुरूंच्या रावपाच्या कुडींतले एके कुडींत आशिल्ले एसींत शॉर्टसर्कीट जालें. हो उजो लागपाचे पयलीं हांगा रावपी धर्मगुरू चर्च सभाघरांत प्रार्थने खातीर गेल्ले. ते कुडींतल्यान भायर सरले उपरांत हो उजो लागलो.
उपरांत हो उजो पातळ्ळो. थंय न्हिदिल्ल्या दोगां धर्मगुरूंनी उजो पालोवपाचो यत्न केलो. घडणुके सुवातेर मोबायल फोनाक नेटवर्क नाशिल्ल्यान ह्या धुर्मगुरूंनी चर्ची भायर धांव घेतली आनी घडणुकेची म्हायती चर्च वेवस्थापन समितीच्या ऍटर्नीक दिली. तांणी रोखडेंच हे विशीं उजो पालोवपी दळाक म्हायती दिली.
पिळर्ण उजो पालोवपी दळाचे कर्मचारी हे कळंगूटे दर्यादेगेर उजो लागिल्ल्या शॅकाचो उजो पालोवपाक व्यस्त आशिल्ले. हाका लागून उजो पालोवपी दळाचे जवान हांगा आयले. तो मेरेन देड वर हुपिल्लें आनी पांच कुडींनी उजो पातळिल्लो.
उजो पालोवपी दळाच्या जवानांनी फोम आनी उदकाचो फवारो मारून दोन वरांनी उजो नियंत्रणांत हाडलो. तशेंच सिकेरीच्या थळाव्यांनी उजो पालोवपाच्या कामांत उजो पालोवपी दळाक मजत केली. ह्या उज्यांत तिगांय धर्मगुरुंच्यो कुडी, रांदची कूड, आनी चर्चीचे दस्तावेज आशिल्ल्या गुदांवाचें लुकसाण जालें.
हे कुडींतले पुरातन फर्नीचर, पुरातन लाकडी वस्तू, नळ्यांचें पांखें, वाशे, पाटी, जेवणाचें सामान, फ्रीज, वीज उपकरणां, कांय दस्तावेज आनी हेर सामान लासलें. वेवस्थापना कडल्यान लुकसाणेचें अंदाजपत्रक आजूनय तयार करूंक ना. मात ८० लाख ते १ कोटी रूपयांच्या घरांत हो लुकसाणेचो आंकडो आशिल्ल्याची तांणी म्हायती दिली.
घडणुकेचो पंचनामो कळंगूटे पुलिसांनी केलो. आमदार मायकल लोबो, कांदोळेचे सरपंच ब्लेझ फर्नांडीस, पंच वांगडी आनी हेरांनी भेट दिवन पळोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
