भांगरभूंय | प्रतिनिधी
येजमान बायलांच्या ऑस्ट्रेलिया अ पंगडा आड चालू आशिल्ले एकोडे चार दिसांचे मॅचींत भारताच्या बायलांच्या अ पंगडान आपली स्थिती घटमूट केली. तिसऱ्या दिसाचो खेळ सोंपलो त्या वेळार भारताची वट्ट आघाडी 254 धांवड्यांचेर पाविल्ली. हातूंत राघवी बिष्ट आनी शेफाली वर्मा हांच्या अर्द शेंकड्यांची म्हत्वाची भुमिका आशिल्ली.
पयल्या डावांत आकर्शक 93 धांवड्यांची खेळी करपी राघवी बिष्टान दुसऱ्या डावांत लेगीत अर्द शेंकड्यांची खेळी केली. तिणें दुसऱ्या डावांत 86 धांवड्यांची खेळी केली. शेफाली वर्मान 52 धांवड्यांचें योगदान दिलें. ह्या दोगांच्या योगदानाक लागून भारतान तिसऱ्या दिसाचो खेळ सोंप मेरेन 8 विकेटी व्हगडावन 260 धांवड्यां मेरेन मजल मारली. अशे तरेन ताची वट्ट आघाडी 254चेर पावली.
तिसऱ्या दिसाचो खेळ सोंपलो त्या वेळार जोशिता 9 आनी तितास साधू 2 धांवड्यो करून खेळटाली. भारतान पयल्या डावांत 299 धांवड्यो केल्ल्यो. शेफाली वर्मान 35, राघवी बिष्टान 93, राधा यादवान 33, जोशितान 51, मिन्नू मणिन 28 आनी तितास साधू हिणें 23 धांवड्यांचें योगदान दिल्लें.
ऑस्ट्रेलिया अ वतीन ब्रावन, जॉर्जिया हिणें 3-3 विकेटी घेतल्यो, जाल्यार जिंजर, लिली मिल्स, एमी एडगर आनी एला हेवार्ड हांणी 1-1 विकेट घेतली.
ते पयलीं ऑस्ट्रेलिया अ वतीन सियाना जिंजर हिच्या 103 आनी निकोल फाल्टम हिच्या 54 धांवड्यां नेटार पयल्या डावांत 305 धांवड्यो केल्यो. अशे तरेन भारत अ आड ताणें नांवाची 6 धांवड्यांची आघाडी घेतली.
भारता वतीन तितास साधू, जोशिता आनी तनुश्री हांणी 1-1 विकेट घेतली. सायम ठाकोर हिणें 3, राधा यादव आनी मिन्नू मणी हिणें 2-2 विकेटी घेतल्यो.
भारताचो अ पंगड सध्या ऑस्ट्रेलियेचे भोंवडेर उत्कृश्ट प्रदर्शन केलां. अनधिकृत टॅस्टी पयलीं जाल्ले वन डे माळेंत भारतान जैत जोडिल्लें. ह्या पंगडांत आशिल्ल्या चडश्या खेळगडयांचो संवसारीक वन डे क्रिकेट सर्ती खातीर वेंचिल्ल्या पंगडांत आस्पाव केला. संवसारीक सर्ती खातीर वेंचिल्ल्यो खेळगडयो ही भोंवडी जाल्या उपरांत घरा येवन रोखडींच सिनीयर पंगडांत सामील जातल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
