भांगरभूंय | प्रतिनिधी
नॉर्थ इस्ट युनायटेडान 137 वर्सां पोरणी फुटबॉल सर्त ड्युरांड करंड सर्त जिखली. काल जाल्ले फायनलींत ताणें डायमण्ड हार्बराक 6-1 अशा व्हडा फरकान हारायलो. फाटल्या हंगामांत लेगीत ताणें वस्तादपण जोडिल्लें.
कोलकाताच्या सॉल्ट लेक स्टेडियमाचेर जाल्ले फायनलींत अणभवी नॉर्थ इस्ट युनायटेडान सर्तींत पदार्पण करपी डायमण्ड हार्बराक कसलीच संद दिली ना. ह्या जैतान नॉर्थ इस्ट युनायटेडाक 1.21 कोटी रुपयांचें इनाम फावो जालें. ड्युरांड करंड सर्त ही आशिया खंडांतली सगल्यांत पोरणी फुटबॉल सर्त आसा.
ड्युरांड सर्तीच्या इतिहासांत व्हडा फरकान जिखपाची ही पयलीच खेप आसा. नॉर्थ इस्टान पयल्या अर्दांत 2-0 अशी आघाडी घेतिल्ली. 30व्या मिनटाक अशीर अख्तरान पयलो गोल केलो. जाल्यार 46व्या मिनटाक प्रतीब गोगोईन दुसरो गोल केलो.
दुसरें अर्द सुरू जायना फुडें थोई सिंगान गोल केलो. डायमण्ड हार्बरा वतीन एकोडो गोल 60व्या मिनटाक लुकान केलो. उपरांत 80व्या मिनटाक जायरोन गोल करून नॉर्थ इस्टाची आघाडी 4-0 अशी केली. दोन मिनटांनी आंद्रेसान गोल करून आपल्या क्लबाचें जैत निश्चीत केलें.
मोहन बगानान विक्रमी 17 खेपे ही सर्त जिखल्या जाल्यार 13 खेपे उप वस्तादपण मेळयलां. दुसरे सुवातेर इस्ट बंगाल आसा. ताणें 16 खेपे हो किताब आपल्या नांवार केला, जाल्यार तिसरे सुवातेर बोर्डर सॅक्युरिटी फोर्स आसा. ताणें 7 खेपे येस मेळयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
