‘म्हजें घर’, गोंयकारांक चवथीची भेट

भांगरभूंय | प्रतिनिधी

थेट संवादांत मुख्यमंत्र्यान समजावन सांगली येवजण

15 सप्टेंबर सावन मेळटले घरां कायदेशीर करपाचे अर्ज

प्रमाणपत्रां सात दिसां भितर दिवपाचे सचिवांक निर्देश

भांगरभूंय । प्रतिनिधी

पणजी : ‘म्हजे घर‌’ येवजणे खाला घरां कायदेशीर करपाचे अर्ज 15 सप्टेंबर सावन उपजिल्होधिकारी, मामलेदार कचेऱ्यो आनी पंचायतींत दितले. 1972 पयलींच्या घरांक 1 हजार शुल्क जाल्यार सरकारी तशेंच कोमुनिदाद जमनींत अतिक्रमण केल्ल्या घरांक नोंदणी शुल्का सयत शुल्काचेर 10 टक्के दंड भरचो पडटलो. ‘म्हजें घर’ येवजण ही गोंयकारांक चवथीची भेट जावन आसा, अशें मुख्यमंत्री डॉ. प्रमोद सावंत हांणी सांगलें.

‘म्हजें घर’ येवजणे वरवीं घरां कायदेशीर करपाची प्रक्रिया समजावन सांगपा खातीर तशेंच लोकांचे जे प्रश्न आसात ते सुटावे करपा खातीर महसूल खात्यान घडोवन हाडिल्ले थेट संवादांत मुख्यमंत्री डॉ. प्रमोद सावंत पंच, सरपंच, नगरसेवक, नगराध्यक्ष आनी गोंयकारांक संबोधीत करतना उलयताले. ह्या वेळार महसूल खात्याचे सचीव संदीप जेकीस, जोडसचीव सुरेंद्र नायक, नियोजन आनी सांख्यिकी खात्याचे संचालक विजय सक्सेना आनी हेर अधिकारी हजर आशिल्ले.

ह्या वेळार उलयतना मुख्यमंत्र्यान सांगलें, ‘म्हजें घर’ येवजणे खाला घरां नियमीत करपाक तशेंच ताचे मालकी हक्क दिवपा खातीर 10 तरतुदी केल्यात आनी हे तरतुदी खातीरचे अर्ज 15 सप्टेंबरा उपरांत उपलब्ध जातले.

सर्वेक्षण आराखड्यांत आशिल्लीं 1972 पयलींचीं सगलीं घरां नियमीत करपा खातीर सरकारान एक परिपत्रक काडलां. ह्या परिपत्रका वरवीं ह्या घरांक कायदेशीर दर्जो मेळटलो आनी पंचायत तशेंच पालिका ह्या घरांक दोन प्रमाणपत्रां दितले. एक तांचे जमीन ही सेटलमेंट क्षेत्र जाल्याचें प्रमाणपत्र आनी दुसरें कायदेशीर केल्ल्याचें प्रमाणपत्र. हीं दोनूय प्रमाणपत्रां सात दिसां भितर दिवपाचे निर्देश सचिवांक दिल्यात, अशें मुख्यमंत्र्यान सांगलें.

गोंय महसूल कोडांत सुदारणा करून महसूल, आल्वारा, मोकासो आनी हेर सरकारी जमनीर आशिल्लीं घरां तशेंच कोड ऑफ कोमुनिदादींत सुदारणा करून कोमुनिदादींतल्या घरांचे मालकी हक्क दितले. जीं घरां 1971 पयलीं परवानगी घेनासतना आपले जमनीर बांदल्यात तीं घरां नियमीत करपा खातीर 1 हजार रुपया शुल्क घेतले. जाल्यार जीं घरां सरकारी आनी कोमुनिदाद जमनीर अतिक्रमण करून बांदल्यात ते खातीर सरकार आनी कोमुनिदाद तांचे कडल्यान घर नोंदणी शुल्क आनी 10 टक्के वसूल करतले, अशी म्हायती मुख्यमंत्र्यान दिली.

ते भायर 20 पॉयंट प्रोगामा खाला दिल्ल्या प्लॉटांक श्रेणी 1 प्रमाणपत्र दिवन ह्या स हजार प्लॉट धनयाक मालकी हक्क दितले. पयलीं ह्या प्लॉटांत आशिल्ल्या घरांक श्रेणी 2 प्रमाणपत्र दिल्ल्या कारणान तांकां दुरुस्ती खातीर सरकाराची परवानगी घेवची पडटाली. तशेंच गोंय पुर्नवसन मंडळान सुमार 450 कुटुंबांक वेगवेगळ्या सुवातांचेर दिल्ल्या फ्लॅटां वांगडाच जमनीचे हक्क दितले. हे फ्लॅट नांवार नाशिल्ल्यान धनयान ह्या फ्लॅटांचेर आडनदर केल्ली, अशें मुख्यमंत्री डॉ. प्रमोद सावंत हांणी सांगलें.

तशेंच ह्या कायद्याचे तरतुदी प्रमाण 15 दिसां भितर घर बांदकाम आनी राबितो परवानगी दिवपा खातीर पंचायत आनी पालिकांक सक्तीचें केलां. जर 15 दिसां भितर परवानगी मेळना जाल्यार ही परवानगी दिल्या अशें गृहीत धरतले. तशेंच घर दुरुस्ती खातीर पंचायत आनी पालिकांक अधिसुचीत केल्लें शुल्क घेवन तें तीन दिसां भितर परवानगी दिवपाचे निर्देश दिल्यात, अशी म्हायती मुख्यमंत्र्यान दिली. लायटीचें आनी उदकाचें वेगळें कनेक्शन दिवपा खातीर घर क्र. विभागणी करपाचे निर्देश लेगीत पंचायतीक दिल्यात. हे खातीर एका घरांतल्या दोन भावांनी घर पटीची रिसीट लावची. कांय शुल्क लावन घर क्र. विभागणी जातली. तशेंच स्टॅम्प ड्युटी आमी देंवोवन जर घर गिफ्ट डीड करतले जाल्यार आतां लाखांनी शुल्क भरपाची गरज ना. हें शुल्क हजारा मेरेन देंवयलां, अशें मुख्यमंत्र्यान म्हणलें.

अर्ज करपा खातीर फक्त 6 म्हयन्यांची वेळ मर्यादा

28 फ्रेब्रुवारी 2024 ह्या दिसा पयलींचीं सरकारी तशेंच कोमुनिदाद जमनी वयलीं घरां कायदेशीर करपाची अधिसुचोवणी उजवाडाक येता त्या दिसा सावन फक्त स म्हयन्यांची मर्यादा अर्ज करपा खातीर आसतली. उपरांत हे अर्ज गृहीत धरचे नात. उपजिल्होधिकारी 6 म्हयन्यां भितर श्रेणी 1 सनद दितले. जे मेरेन हे अर्ज निकालात काडिनात ते मेरेन हीं घरां मोडचे नात. ते भायर सनद मेळटकच 20 वर्सां मेरेन हीं घरां दुसऱ्यांक ट्रान्सफर करपाक मेळची नात. पूण आपल्या कुंटुंबांतल्या वांगड्याक हें घर गिफ्ट डीड करपाक मेकळीक दिल्या, अशी म्हायती महसूल खात्याचे जोडसचीव सुरेंद्र नायक हांणी दिली.

कोमुनिदादीन अर्ज भायर मारल्यार करतले फेरविचार

कोमुनिदादींतलीं घरां नियमीत करचे पयलीं थळावे कोमुनिदादीक अर्ज करचो. जर कोमुनिदाद थारावीक वेळांत जर अर्ज निकालात काडिना जाल्यार ते दिल्याचे गृहीत धरतले. जर कोमुनिदाद हे अर्ज भायर मारतात जाल्यार हे विशीं कोमुनिदाद प्रशासका कडेन आव्हान दिवपाक शकतात. जर कोमुनिदाद प्रशासकांत हे अर्ज भायर पडटात जाल्यार सरकार ह्या अर्जांचेर फेरविचार करतलें, अशें नायक हांणी सांगलें.