सायबर सुरक्षा मळार करियर संद

भांगरभूंय | प्रतिनिधी

बँकिंग तें भलायकी सेवा, शिक्षण तें प्रशासन, संप्रेशण ते वाणिज्य मेरेन सगळेंच ऑनलायन चलता. अशा अरविल्ल्या डिजिटलीकरणाच्या काळांत सायबर सुरक्षा हें एक म्हत्वाचें क्षेत्र म्हणून उदेलां. फाटले लेखांत आमी पळयलें, सायबर सुरक्षा म्हणल्यार कितें आनी ती कितली गरजेची तें. सायबर घात जावपाचे प्रमाण वाडत आशिल्ल्यान ह्या घाताचे आड राखण करपा खातीर कुशळ सायबर सुरक्षा तज्ञ वेवसायिकांची मागणी व्यापकपणान वाडत आसा. सायबर सुरक्षा मळार करियर करतल्यांक जॉब सेक्युरिटी आनी घसघशीत पगार मेळटाच, पूण दिसपट्टे अब्जांनी लोक जाचेर आदारून आसतात त्या डिजिटल मुळाव्या साधन सुविधांचें संरक्षण करपाचें समाधान म्हणल्यार जॉब सेटिसफेक्शनय मेळटा. सायबर सुरक्षा मळार गरजेची कुशळटाय, करियर संदी,फुडार हाचे बद्दल ह्या लेखांत पळोवया.
सायबर सुरक्षा म्हणल्यार संगणक, सर्वर, मोबायल डिव्हायस, नेटवर्क आनी डेटा हो मेलिशियस हल्ल्यांतल्यान सुरक्षीत दवरपाच्यो पद्दती. तातूंत नेटवर्क आनी संगणक प्रणाली सुरक्षीत करप, असुरक्षीतताय वळखूवप, घातांचेर नियंत्रण दवरप आनी सायबर घडणुकांक प्रतिसाद दिवप हांचो आस्पाव जाता. डिजिटल म्हायतीची गुप्तताय, अखंडताय आनी उपलब्धताय सुनिश्चीत करपा खातीर व्यक्ती आनी संघटना खातीर सायबर सुरक्षा गरजेची आसता.
भारतांत जाल्ल्या डिजिटल इंडीया, स्मार्ट सिटीस आनी नव-निर्मीत अरविल्ल्या प्रकल्पा खातीर सायबर सुरक्षा हें एक गतिशील आनी सदांच विकसीत जावपी क्षेत्र जावन आसा. सद्य स्थितींत जितले सायबर तज्ञांची मागणी वा गरज आसा तितले कुशळ वेवसायीक आमच्या देशांत उपलब्द नात. म्हूण सायबर सेक्युरिटीं क्षेत्रांत एकाद्यान करियर करपाचें थारायल्यार ताका बरे पैकी संद आसा.
सायबर सेक्युरिटींत करियर कित्याक?
डेटा ब्रीच, फिशिंग, रॅनसमवेअर, आयडेंटिटी थेफ्ट, सायबर स्पाईंग अशे सायबर गुन्यांव वाडत आसात. बँकिंग, संरक्षण, ई-कॉमर्स, भलायकी जतनाय, आनी शिक्षण ह्या सारक्या क्षेत्रांतल्यो संघटना आपल्या डिजिटल मालमत्तेची राखण करपा खातीर सायबर सुरक्षेंत व्हड प्रमाणांत गुंतवणूक करतात. अद्ययावत यंत्रणे वांगडाच कुशळ मनीसबळ आसप तितलेंच गरजेचे. म्हूण सायबर
सुरक्षा तज्ञाची चड मागणी आसता.
कुशळ सायबर सुरक्षा तज्ञ
वेवसायिकांचो उणाव आशिल्ल्यान आयटी उद्देगांतल्या सगळ्यांत चड पगार मेळोवपी वेवसायिकां मदीं सायबर सुरक्षा तज्ञ आसात.
सीईआरटी- ईन, डिआरडीओ, एनटीआरओ, आयबी सारक्यो भारतीय सरकारी एजंसी आनी कायदा अमंलबजावणी करपी खातें सायबर सॅक्युरिटी तज्ञ नेमतात. फकत भारतांतच न्ही तर संवसारभर सायबर सुरक्षा एक्सपर्टांची मागणी आसा. योग्य प्रमाणपत्रां आनी अणभव आसल्यार वेवसायिकांक मल्टी नेशनल कंपनी, सरकारी एजन्सी आनी आंतरराष्ट्रीय संघटनांनी नोकरी संद मेळूं येता. समस्या सोडोवपाक, घाताचें विश्लेशण करपाक आनी प्रगत तंत्रगिन्याना वांगडा काम करपाक आवडपी लोकां खातीर ही कारकीर्द सतत बौध्दिक उर्बा दिता.
सायबर सुरक्षा मळावेल्यो करियर संदी
सायबर सुरक्षा हें एक व्हडलें क्षेत्र आसून तातूंतले जायते जॉब रोल्स अशे:

1. सुरक्षा विश्लेशक (सेक्युरिटी एनालीस्ट)- सुरक्षा विश्लेशक हो सुरक्षा उल्लंघना खातीर नेटवर्कांचेर नियंत्रण दवरता, घडणुकांची चवकशी करता आनी फुडले हल्ले आडावपाचे उपाय चालीक लायता. संगणक प्रणाली आनी नॅटवर्क हल्लो जावचे आदींच ते पासून सुरक्षीत दवरपाची जापसालदारकी ताचेर आसता.
2. नैतिक हॅकर (एथीकल हॅकर) -हॅकर म्हणटकच आमचे दोळ्यां मुखार गुन्यांवकारीच येता, जो आमचे संगणक वा मोबायल हॅक करून आमका अर्थीक लुकसाण करता. पूण नैतीक हॅकराची सायबर सुरक्षेंत खूब गरज आसता. नैतीक हॅकर्स गुन्यांवकारी हॅकर्सांनी वापरप्यांचीं उपकरणां आनी नॅटवर्क हॅक करचे पयलींच प्रणालींतली (सिस्टम) असुरक्षीतताय सोदून काडून ती सुरक्षीत करतात. नैतीक हॅकर हो गुन्यांवकारी हॅकरा परस एक पावल फुडें आसचो पडटा जाल्यारच तो घात वळखून ताका उपाय योजना करपाक पावता.
3. सायबर फॉरेंसीक तज्ञ – सायबर फॉरेंसीक तज्ञ हो कायदेशीर कार्यवाहींत वापरपा खातीर डिजिटल पुरावे एकठांय करून आनी विश्लेशण करून सायबर गुन्यांवांची चवकशी करता. कोर्टांत फकत सायबर फॉरेंसीक तज्ञान दिल्ले डिजिटल पुरावे ग्राह्य धरतात.
4. सुरक्षा वास्तुकार (सेक्युरिटी आर्कीटेक्ट) -संघटनेंत एक सुरक्षीत आयटी मुळावी बांदावळ डिझायन करपा खातीर सेक्युरिटी आर्कीटेक्टाची गरज आसता. वापरांतल्यो सगळ्यो संगणक प्रणाली, सुरक्षा धोरणांक आनी नेमांक पाळो दितात हाचीय खात्री तोच करता.
5. मुखेल म्हायती सुरक्षा अधिकारी (सीआयएसओ) -सीआयएसओ हो एकंदर म्हायती सुरक्षा धोरणां आनी ऑपरेशन्स सांबाळपी आनी जापसालदार आशिल्लो वरिश्ठ कार्यकारी अधिकारी.
6. इंसिडंट रिस्पॉन्डर – सायबर हल्ले वळखुपाक आनी सायबर हल्ल्यांत जाल्लें लुकसाण उणें करपाक तशेंच डेटा परत मेळोवपाच्या कामाची जापसालदारकी इंसिडंट रिस्पॉन्डराची आसता.
7. मालवेअर विश्लेशक (मालवेअर एनालीस्ट) – डिजीटल उपकरणांक लागपी व्हायरस, वर्म्स आनी हेर मालवेअर सॉफ्टवॅर जें प्रणालीक हानीकारक आसता तांचो अभ्यास वा संशोधन करप आनी तांचे आड प्रणालीची कशी राखण करची हें समजून घेवप हाची जापसालदारकी मालवेअर एनालीस्टाचेरआसता.
8. क्रिप्टोग्राफर – संवेदनशील म्हायती सांबाळून दवरपाक वा नॅटवर्कांतल्यान दुसरे जाग्यार पासार करतना, एन्क्रिप्शन गरजेचें आसता. एनक्रिप्शन केल्ली म्हायती कोणाच्याय हातांत पडली लेगीत जाल्यार ती वाचून ताचो अर्थ समजना. फकत नेटवर्काच्या दुसरे तोंकार पावतकच संगणक प्रणाली ती म्हायती परत डिक्रिप्ट करता. ते उपरांतच ती वाचपाक मेळटा. वॉट्सएपारय तेंच तंत्र वापरिल्लें आशिल्ल्यान आमचे कसलेंय संदेश आमी बिनधास्त धाडपाक शकतात. खंयच्याय संघटनेक हे तंत्रगिन्यान जाणा आशिल्लो तज्ञ गरजेचो आशिल्ल्यान तातूंतय करियर करपाची संद आसा.
   सायबर सुरक्षा मळार करियर करपा खातीर शिक्षणीक पात्रताय आनी कांय गरजेचीं कौशल्यां
   सायबर सुरक्षा मळार यशस्वी करियर करपा खातीर तंत्रीक आनी मृदु (सॉफ्ट स्कील) कुशळताय मेळोवची पडटात. विश्लेशणात्मक विचार करपाची तांक, समस्या सोडोवपाची कळाशी, संवाद ,कौशल्य तपशीलाचेर लक्ष दिवप, पंगडांच काम करपाचे कौशल्य ज्या व्यक्तींत आसा ताका निश्चितपणान सायबर सेक्युरिटींत करियर करपाक संद मेळूंक शकता. सर्व सामान्यपणान सायबर सुरक्षा करियरा खातीर संगणक विज्ञान, म्हायती
   तंत्रज्ञान वा सायबर सुरक्षा हातूंत
   पदवी चडशे जॉब रोल्सांत जाय
   पडटा. म्हायती सुरक्षा वा
   सायबर कायद्यांत पदव्युत्तर पदवी
   वा पीजी डिप्लोमा आसप हो एक जोड फायदो.
   वेवसायीक प्रमाणपत्रां – कुशळटाय प्रमाणीत करपी कांय मुखेल प्रमाण पत्रां अशीं आसात: सर्टिफाइड एथिकल नैतिक हॅकर (CEH), CompTIA सेक्युरिटी+, सर्टिफाइड इन्फोर्मेशन सिस्टम सेक्येरिटी प्रोफेशनल (CISSP), सर्टिफाइड इन्फोर्मेशन सेक्युरिटी(CISM), सिस्को सर्टिफाइड सायबरऑप्स असोसिएट, जीआयएसी सेक्युरिटी एसेन्शियल्सGSEC)
   करियर मार्ग आनी वाड
   सायबर सुरक्षा वेवसायीक आवड आनी विशेशज्ञतेचेर आदारीत वेगवेगळे जॉब रोल्स मेळोवपाक शकता: प्रवेश पातळेचेर- सायबर सुरक्षा तंत्रज्ञ, कनिश्ट विश्लेशक, सुरक्षा प्रशासक. मध्य पातळेचेर : सुरक्षा अभियंतो, पॅनेट्रेशन टॅस्टर, इंसिडंट हॅंडलर आनी वरिश्ठ पातळेचेर: सायबर सुरक्षा सल्लागार, सुरक्षा आर्किटेक्ट, सीआयएसओ म्हूण जॉब रोल्स सहज मेळूंक शकतात. सतत शिकप आनी काम करपाचो अणभव गाठीक जोडटकच वेवसायीक उंचेल्या पदांचेर वचूंक शकतात वा स्वताचे सल्लागार फर्म लेगीत स्थापन करूंक शकतात.
   सायबर सुरक्षा वेवसायीकांक कामार घेवपी उद्देग
   चड करून दर एका उद्देगांत सायबर सुरक्षा तज्ञांची गरज आसा, तातूंत: बँकींग आनी अर्थीक (डिजिटल वेव्हार आनी गिरायक डेटा सुरक्षीत दवरपा खातीर), भलायकी जतनाय (रुग्णांचो नोंदी आनी हॉस्पिटल नेटवर्काची राखण करपाक), सरकार आनी संरक्षण (राश्ट्रीय सुरक्षा आनी गुप्तचर म्हायती खातीर), आयटी आनी दूरसंचार (मुळावी साधन सुविधा सुरक्षे खातीर), ई-कॉमर्स (ऑनलायन फटवणूक आनी डेटा चोरी आडावपा खातीर), शिक्षण (डिजिटल शिकपाचे प्लॅटफॉर्म आनी विद्यार्थ्यांचो डेटा सुरक्षीत दवरपा खातीर), स्टार्टअप आनी भोवराष्ट्रीय म्हामंडळांतय सायबर सुरक्षा तज्ञ गरजेचो आसता. उदरगत जावपी आनीकय कांय क्षेत्रां म्हणल्यार क्लाउड सेक्युरिटी, सायबर सुरक्षांत एआय आनी मशीन लर्निंग, आयओटी (इंटरनेट ऑफ थिंग्स) सुरक्षा, ब्लॉकचेन सुरक्षा.
   सायबर सुरक्षा करियराचो फुडार
   भारत डिजिटल फुडारा कडेन वचपाक लागला तेन्ना सायबर सुरक्षा आतां फकत करियर पर्याय न्हय-ती एक राष्ट्रीय गरज आनी जागतीक संद. भारतात सायबर सुरक्षा वेवसायिकांची मागणी व्हड प्रमाणांत वाडपाची अपेक्षा आसा. उद्देगधंद्याच्या अदमासा प्रमाण फुडल्या कांय वर्सांत भारताक 10 लाखां वयर सायबर सुरक्षा वेवसायिकांची गरज पडटली.
   डिजिटल प्रणालींचेर चडांत चड अवलंबून आशिल्ल्या संवसारांत सायबर सुरक्षा वेवसायीक डिजिटल रक्षक आसतात. संवसार बदलता तशे फकत दोतोर, इंजिनीयर सारकेल्या पारंपारीक वेवसायाचें शिक्षण घेवन त्या सेच्युरेट जाल्ल्या वेवसायांत करियर करचे परस तरणे पिळगेन ह्या नव्या मागणी आशिल्ल्या करियरा कडेन वळप ही काळाची गरज आसा. योग्य शिक्षण, प्रमाणपत्रां, अणभव आनी सायबर घात करप्यांच्या एक पावल मुखार रावपाची इत्सा हांचो मेळ घालत तरणाटी पिळगी ह्या गतीशील मळार थीर आनी समृध्द करियर तयार करूंक शकतात.
9. मंजुषा सिनाय तळावलीकार