भांगरभूंय | प्रतिनिधी
म्हापशें ः हडफडेंच्या एम एन रिसॉर्टाच्या कुडींतल्यान महाराष्ट्रांतल्या पर्यटकांच्यो 1.35 लाखांच्यो वस्तू चोरिल्ल्यो. ह्या चोरी प्रकरणांत हणजूण पुलिसांनी दुबावीत अब्दूल लतिफ माजिद (20, जयपुर राजस्थान) हाका अटक केल्या.
ही चोरयेची घडणूक 7 ऑगस्टाक सकाळीं 5 ते 8 वरां मजगतीं घडिल्ली. सागर वधाई (गडचिरोली, महाराष्ट्र) हांणी हे संबंदी पुलिशेंत कागाळ केल्ली. कागाळदार आनी ताचे इश्ट भोंवपा खातीर गोंयांत आयिल्ले आनी ते एम एन रिसॉर्टांत राविल्ले.
चोरयेच्या वेळार कागाळदार पर्यटक रिसॉर्टांतल्या कुडींत न्हिदिल्ले. त्या वेळार अनवळखी दुबावीत कुडींत भितर सरलो आनी 60 हजारांचो आयफोन, 40 हजारांचो सॅमसंग, 30 हजारांचो रियलमी आनी 5 हजारांची स्मार्ट वॉच मेळून वट्ट 1.35 लाखांच्यो वस्तू चोरून व्हेल्यो.
कागाळ करतकच पुलिसांनी रिसॉर्टाच्या सीसीटीव्ही फुटेजाचेर आदारून चवकशी करून दुबाविताक अटक केली. दुबावीत अब्दुल माजिद हाचे कडल्यान 1.30 लाखांचें तिनूय चोरिल्ले मोबायल फोन पुलिसांनी जप्त केल्यात. स्मार्ट वॉच अजून मेळूंक ना. हे विशीं पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
