भांगरभूंय | प्रतिनिधी
पणजी ः विद्यार्थ्यांचें येस परिक्षेच्या निकालाचेर न्हय तर तांचे कश्ट करपाचे तयारेचेर, वकिली मळार आशिल्ली निश्ठा आनी समर्पणाचेर आदारून आसता अशें सरन्यायाधीश भूषण गवई हांणी सांगलें. शेनवारा व्ही.एम. साळगांवकार लॉ कॉलेजींत आयोजीत केल्ल्या कार्यावळींत ते उलयताले. ह्या वेळार मुंबय उच्च न्यायालयाचे न्यायाधीश आलोक आराधे, न्यायाधीश भारती डांगरे, न्यायाधीश महेश सोनक आनी संस्थेचे अध्यक्ष दत्तराज साळगांवकार हाजीर आशिल्ले.
हांव विद्यार्थी आसतना चडसो वेळ कॉलेजींत रावचे परस कॉलेजी भायर आसतालो. एके तरेन हांव एक ‘आऊटस्टँडिंग’ विद्यार्थी आशिल्लो. त्या वेळार परिक्षेंत हांवें तिसरो क्रमांक मेळयल्लो. आयज हांव भारताचो सरन्यायाधीश आसा. मेरिट लिस्टांतले गूण तुमचें येस थारयना अशें म्हाका दिसता. तुमी कितले कश्ट करतात, कितले बरें काम करतात आनी त्या- त्या थारावीक मळार कितले बांदिल आसात हाचेर तुमचें येस थारता. कायदो शिक्षणाचे प्रक्रियेंत व्हड बदल जाला. नव्या विद्यार्थ्यांनी हाचो फायदो घेवचो अशें तांणी सांगलें.
साळगांवकार घराण्यान येस मेळयलें पूण तें फकत आपल्या पुरती मर्यादीत दवरलें ना. तांणी ह्या मळार उदरगत केल्याच तेच बरोबर अशें म्हाविद्यालय सुरू करून थळाव्या विद्यार्थ्यांक शिक्षण घेवपाची संद दिली. ह्या म्हाविद्यालयांतले आदले विद्यार्थी आयज न्यायाधीश, वरिश्ठ वकील, सरकारी वकील म्हणून काम करतात. आयज हाजीर आशिल्ल्या विद्यार्थ्यांकय कश्ट करून त्या जाग्यार पावपाची संद मेळटा. समाजांतल्यान कितेंय घेवन येस मेळटा तेन्ना समाजाक परतून मजत करप गरजेचें आसता अशें तांणी सांगलें.
कनिश्ट वकिलांक मजत करची
कांय वरिश्ठ वकील कनिश्ट वकिलांक सामकेच उणे स्टायपेंड दितात. कनिश्ट वा नव्या वकिलां खातीर असो निधी पुरो जायना. वरिश्ठ वकिलांनी कनिश्ट वकिलांक उदार मनान मजत करची. साळगांवकार महाविद्यालयाचें इन्क्युबेशन सेंटर नव्या वकिलांक मजत करता. हेर म्हाविद्यालयांनीय अशे उपक्रम सुरू करचे अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
