भांगरभूंय | प्रतिनिधी
मुख्यमंत्र्यां कडल्यान लायव्ह संवादात येवजणेचेर उजवाड
भांगरभूंय । प्रतिनिधी
पणजीः म्हजें घर येवजणे खाला घरां कायदेशीर करपाचे अर्ज 15 सप्टेंबर सावन उपजिल्होधिकारी, मामलेदार कचेऱ्यो आनी पंचायतींत दितले. 1972 पयलींच्या घरांक 1 हजार शुल्क जाल्यार सरकारी तशेंच कोमुनिदाद जमनीत अतिक्रमण केल्ल्या घरांक नोंदणी शुल्का सयत शुल्काचेर 10 टक्के दंड भरचो पडटलो. म्हजें घर येवजण ही गोंयकारांक चवथीची भेट जावन आसा, अशें मुख्यमंत्री डॉ. प्रमोद सावंत हांणी सांगलें.
म्हजें घर येवजणे वरवीं घरां कायदेशीर करपाची प्रक्रिया समजावन सांगपा खातीर तशेंच लोकांचे जे प्रश्न आसात ते सुटावे करपा खातीर महसूल खात्यान घडोवन हाडिल्ल्या लायव्ह संवादात मुख्यमंत्री डॉ. प्रमोद सावंत हांणी पंच, सरपंच, नगरसेवक, नगराध्यक्ष आनी गोंयकारांक संबोधीत करताना उलयताले. ह्या वेळार येणावळ सचिव संदीप जेकीस, जोड सचिव सुरेंद्र नायक, नियोजन आनी सांख्यिकी संचालक विजय सक्सेना आनी हेर अधिकारी हजर आशिल्ले.
ह्या वेळार उलयतना मुख्यमंत्र्यान सांगलें, म्हजें घर येवजणे खाला घरां नियमीत करपाक तशेंच ताचे मालकी हक्क दिवपा खातीर 10 तरतुदी केल्यांत आनी ह्या तरतुदी खातीरचे अर्ज 15 सप्टेंबर उपरांत उपलब्ध जातले.
सर्वेक्षण आराखड्यांत आशिल्ली 1972 पयलींची सगळीं घरां नियमीत करपा खातीर सरकारान एक परिपत्रक काडलां. ह्या परिपत्रका वरवीं ह्या घरांक कायदेशीर दर्जो मेळटलो आनी पंचायत तशेंच पालिका ह्या घरांक दोन प्रमाणपत्र दितले. एक तांचे जमीन ही सेटलमेंट क्षेत्र जाल्याचे प्रमाणपत्र आनी दुसरे कायदेशीर केल्ल्याचें प्रमाणपत्र. ही दोनूय प्रमाणपत्रां सात दिसां भितर दिवपाचे निर्देश सचिवांक दिल्यात, अशें मुख्यमंत्र्यान सांगलें.
गोंय महसूल कोडात सुदारणा करून महसूल, आल्वारा, मोकासो आनी हेर सरकारी सुवातेत आशिल्ली घरां तशेंच कोड ऑफ कोमुनिदादींत सुदारणा करून कोमुनिदादींतल्या घरांचे मालकी हक्क दितले. जी घरां 1971 पयलीं परवानगी घे नासतना आपल्या सुवातेत बांदल्या ती घरां नियमीत करपा खातीर 1 हजार इतले शुल्क घेतले. जाल्यार जी घरां सरकारी आनी कोमुनिदाद सुवातेत अतिक्रमण करून बांदल्यात ते खातीर सरकार आनी कोमुनिदाद तांचे कडल्यान घर नोंदणी शुल्क आनी 10 टक्के वसूल करतले, अशी म्हायती मुख्यमंत्र्यान दिली.
ते भायर 20 पोयंट प्रोगाम सकयल दिल्ले प्लॉट्सांक श्रेणी 1 प्रमाणपत्र दिवन ह्या स हजार प्लॉट धनयांक मालकी हक्क दितले. तशेंच गोंय पुर्नवसन महामंडळान दिल्ले सुमार 450 कुटुंबांक वेगवेगळ्या सुवातेर दिल्ल्या फ्लॅटां वांगडाच जमनीचे हक्क दितले, अशें मुख्यमंत्री डॉ. सावंत हांणी सांगलें.
म्हजें घर येवजणे खाला तरतुदी
० 1972 पयलींची घरां नियमीत करपी परिपत्रक
० गोंय जमीन महसूल सुदारणा
० कोड ऑफ कोमुनीदाद सुदारणा
० अनियमीत बांदकामां नियमीत करपाचो कायदो (रुका) 2025
० 20 पोईंट प्रोग्राम
० स्टेंम्प ड्युटीत घट
० घर क्रं विभागणी परिपत्रक
० 15 दिसां भितर घर दुरूस्ती परवानगी परिपत्रक
० 15 दिसां भितर बांदकाम आनी राबितो दाखलो परिपत्रक
० गोंय पुनर्वसन मंडळ कायदो
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
