भांगरभूंय | प्रतिनिधी
पणजी ः ओ कोकेरो जंक्शन ते मॉल दे गोवा रस्त्याची दावी बाजू फाल्यांच्यान, 24 ऑगस्ट 2025 सावन 31 जानेवारी 2026 मेरेन बंद आसतली. भैशीक बांदकाम खात्यान आदेश तसो आदेश जारी केलां. उड्डाण पुलाच्या कामा खातीर हो निर्णय घेतला अशें अधिकाऱ्यांनी सांगलें.
प्रकल्प बेगीन आनी सुरळीत पुराय जावचो हे खातीर आनी प्रवाशांचे सुरक्षे खातीर हो निर्णय घेतला. ह्या काळांत थळाव्यांची आनी प्रवाशांची गैरसोय जावची न्हय म्हूण पर्यायी मार्गांची वेवस्था केल्या अशें कार्यकारी अभियंते आनी राष्ट्रीय म्हामार्ग 66चे प्रशासक जूड ए. डी. कार्व्हालो हांणी सांगलें. ह्या काळांत सगली येरादारी बोरकार रस्तो मार्गान जातली. व्हडा प्रमाणांत येरादारीची कोंयडी जातली. तशेंच गरजेच्या सुवांतेर ‘डायव्हर्शन’ आनी ‘नो पार्किंग’ अशें तकटे लायतले.
थळाव्या वेपाऱ्यांनी मात ह्या निर्णयाचो आपल्या वेवसायाचेर परिणाम जावपाची शक्यताय उक्तायल्या. पर्यायी मार्गांचेर येरादारीची कोयंडी वाडटली. देखून येरादारी नियोजन सुरळीत करपा खातीर प्रशासनान खर उपाय करचे अशी अपेक्षा नागरिकांनी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
