भांगरभूंय | प्रतिनिधी
पणजी ः जीएमसींच्या सुरक्षा रक्षकान एका दुयेंतीच्या सोयऱ्याक बडयलो. ह्या प्रकरणांत आगशी पुलिसांनी गुन्यांव नोंद करून जीएचआरडीसीचो सुरक्षा रक्षक दुबावीत भागू येडगे (27, साकोड्डें, धारबांदोडें) हाका अटक केली.
ही घडणूक 19 ऑगस्टाक जीएमसींच्या सुपर स्पेशॅलिटी ब्लॉकाच्या सव्या माळ्यार आशिल्ल्या 61 व्या वॉर्डांत घडली. पुलिसांनी दिल्ले म्हायती प्रमाण, दुयेंतीच्या सोयऱ्या मदीं आनी सुरक्षा रक्षका मदीं ल्हानसो वाद जालो. उपरांत वाद वाडिल्ल्यान दुबावीत येडगे हांणी कागाळदाराचेर हल्लो केलो. ह्या हल्ल्यात कागाळदाराच्या गालाक गंभीर जखम जाली आनी रगत येवपाक लागलें.
घडणुके उपरांत आगशी पुलिसांनी कागाळीचेर आदारुन रातीं उसरां दुबाविताचेर गुन्यांव नोंद करून ताका अटक केली. दुबावीत गोवा ह्युमन रिसोर्स डेव्हलपमेंट कॉर्पोरेशन (GHRDC) खाला सुरक्षा रक्षक म्हणून काम करतालो. आगाशी पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
