भांगरभूंय | प्रतिनिधी
पणजीः आम आदमी पक्षान गोंयच्या रस्त्यांचेर फोंडकुलां संबंदी भाजपाचो बुराक आंदोलन सुरू केल्लें. राज्यांतल्या फोंडकुलाच्या रस्त्यांचो निशेध केलो. हाका लागून रोखडीच न्हिदील्ल्या सरकाराक जाग आयली. हाका लागून वेगवेगळ्या सुवातेर फोंडकुलां भरपाचें काम सुरू जालां अशें आपचे प्रदेश अध्यक्ष अमीत पालेकार हांणी सांगलें. शुक्रारा पणजेंत जाल्ले पत्रकार परिशदेंत ते उलयताले. ह्या वेळार वाल्मीकी नायक आनी श्रीकृष्ण परब हेय हाजीर आशिल्ले.
भाजपाचो बुराक आंदोलना खातीर सुरू जाल्ले हेल्पलायनीक राज्यभरांतल्यान बरो प्रतिसाद मेळ्ळो अशें पालेकार हांणी सांगलें. हाचो अर्थ रस्त्यांचेर पडिल्ल्या फोंडकुलांचेर लोक बेजारिल्ले. मांद्रेंतल्या आंदोलना उपरांत फकत दोन वरांत फाेंडकुलां भरपाचें काम सुरू जालें. तेच प्रमाण पणजी, कालापूर, पर्वरी, मयें, कुडटरी, काणकोणां आंदोलन जाले उपरांतय काम सुरू जालां. हाचे वयल्यान आप लोकांच्या समस्यांक हातांत घेतली जाल्यार फकत सरकार न्हय तर हेर विरोधी पक्षूय जागे जातले हें स्पश्ट जाता.
तांणी सांगलें, राज्यांत चड पावस पडपाक लागून रस्त्यांचेर फोंडकुलां दिसतात अशें म्हणटात. पूण नव्या तंत्रगिन्यानाचो उपेग करून बरे रस्ते तयार करप शक्य आसा. सरकार हे विशीं गंभीर ना. सगले आमदार दुचाकी गाडयेन पर्वरी सावन मापशें मेरेन वतात जाल्यार तांकां खरी परिस्थिती समजतली. आतां मेरेन फकत एकाच कंत्राटदाराक वायट कामाक लागून ब्लॅकलिस्ट केला. मुळांतूच फोंडकुलां संबंदी कंत्राटदार आनी बांदकाम खात्याच्या सगळ्या अभियंत्यांचेर खर कारवाय जावपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
