भांगरभूंय | प्रतिनिधी
पणजीः बनावट बिलां वरवीं सुमार 40 कोटी रुपयांच्या जीएसटी घोटाळ्याच्या प्रकरणांत जीएसटी गुप्तचर महासंचालनालयाच्या गोंय विभागान पुखराज किशना राम (मूळ राजस्थान) हाका अटक केल्या. म्हापशेंच्या पयल्या वर्गाच्या न्यायालयान ह्या प्रकरणांत दुबाविताचो जामीन न्हयकारला.
राज्यांत बनावट बिलां वरवीं जीएसटी घोटाळो सुरू आसा अशी म्हायती डीजीजीआयच्या गोंय विभागाक मेळिल्ली. ते प्रमाण तांणी मळावी चवकशी केली तेन्ना बार्देस तालुक्यांतल्या शिवोली आनी म्हापशें वाठारांतल्या ‘संदीप होम अप्लायन्सेस’ आनी ‘अभिषेक होम अप्लायन्सेस’ ह्या दोन आस्थापनांतल्यान हो घोटाळो सुरू आशिल्ल्याचें स्पश्ट जालें. उपरांत चवकशे प्रमाण राजस्थानांतल्या मुकेश कुमार ह्या कामगाराच्या बोटांचे ठशे वापरून आधार कार्ड मेळयलें आनी दोनूय आस्थापनांची नोंद एकाच नांवान केल्ली.
ह्या आस्थापनांनी एकठांय 190 कोटी रुपयांची उलाढाल दाखयली, पूण बनावट पावणी आनी बनावट इनपुट टॅक्स क्रेडीट (आयटीसी) दावे व्हड प्रमाणांत केल्ल्याचेंय उक्तें जालें.
वयल्या आस्थापनांचे मोबायल क्रमांक सत्यापीत करतना 65 आस्थापनांनी होच क्रमांक वापरिल्ल्याचें दिसून आयलें. खोटी बिलां तयार करप, आयटीसीचे दावे करप, बँक खातीं उगडप, बनावट आधार कार्ड तयार करप अशे जायते वेव्हार ह्या क्रमांकांतल्यान जाताले. मोबायल लोकेशन तपासल्या उपरांत चेन्नय, बेंगळुरू आनी आंध्र प्रदेशांतल्या लोकांनी हो नंबर वापरला हें स्पश्ट जालें आनी वयल्या सुवातेर धाड घाली.
त्या वेळार खात्यान पुखराज किशना राम (मूळ राजस्थान) चेन्नयच्यान धरलो. दुबावीत पुखराजाक सुरवेक म्हापशेंच्या पयल्या वर्ग न्यायालयान जीएसटी खात्याच्या ताब्यांत दवरलो. ते उपरांत ताका 14 दीस न्यायालयीन ताब्यांत दवरलो. मजगतीं, दुबावितान न्यायालयांत दाखल केल्लो जामीन अर्ज न्यायालयान न्हयकारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
