भांगरभूंय | प्रतिनिधी
टॅक्सी संघटने वांगडा जाली बसका
भांगरभूंय । प्रतिनिधी
पणजीः टॅक्सी वेवसायांत सुरक्षा, पारदर्शकता आनी दराचे सुसुत्रीकरण करपा खातीर 10 सप्टेंबराक टॅक्सी खातीर गोंय सरकार नवें धोरण हाडटलें. तें गोंय कॅब एग्रीगेटर्स अधीसुचोवणेची सुवात घेतलें. सध्याचे अधिसुचोवणीचो मसुदो रद्द जातलो, अशें मुख्यमंत्री डॉ. प्रमोद सावंत हांणी टॅक्सीकारां वांगडचे बसके उपरांत सांगलें. गोंय राज्य धोरण हाडपाच्या निर्णयाक टॅक्सी संघटनांनी येवकार दिला.
कॅब एग्रीगेटर्स अधिसुचोवणेच्या कोफुसांवाचे फाटभूयेंर डॉ. सावंत हांणी टॅक्सी संघटनेच्या पदाधिकाऱ्या वांगडा बसका आपयिल्ली. एग्रीगेटर्स विशीं टॅक्सीकारांचे जे विशय आसात ते जाग्यार घालपाक चर्चा करून तांच्यो सुचोवण्यो घेतल्यो. हे बसकेंत येरादारी मंत्री मावीन गुदिन्हो आनी पर्यटन मंत्री रोहन खंवटे हांचे सयत टॅक्सी वेवसाय संबंदीत वाठारांतले आमदार हजर आसले.
दक्षीण आनी उत्तर गोंयांतले शेंकड्यांनी टॅक्सीकार आपल्या शिष्टमंडळाक तेंको दिवपाक मंत्रालया भायर हजर आशिल्ले. हें बसकेंत रेंट अ कॅब, मोटर सायकल पायलट आनी रिक्षा धनी संघटनेचें प्रतिनिधी हजर आशिल्ले. डॉ. सावंत हांणी तांचेय म्हणणें आयकून घेतलें. दर थारावपा बरोबरच गोंयात येवपी पर्यटकांक सुरक्षित अणभव दिवपा खातीर आमका एक एकंदरीत टॅक्सी धोरण हाडून हे विशय सुटावे करचे पडटले, अशें मुख्यमंत्र्यान सांगलें.
सगळ्या टॅक्सी धनयांच्या प्रतिनिधींनी सुचोवण्यो दिल्यात आनी 10 सप्टेंबर मेरेन तांका गोंय राज्य टॅक्सी धोरण मसुदो दितां अशें सांगलां. ह्या धोरणांत सगळ्या विशयांचो आस्पाव जातलो. सगळे पारंपरीक टॅक्सी धनी फोंडे, साखळे सयत दर्यादेगेर आनी रेल्वे स्टेशनाचेर चलोवपी टॅक्सी तशेंच गोंयात येवपी पर्यटका खातीर हे धोरण आसतले, अशी म्हायती मुख्यमंत्र्यान दिली.
वेवसायांत कशी पादर्शकताय हाडप तशेच पर्यटकांक सुरक्षित अणभव कसो मेळटलो हो सगळो विशय लक्षात घेवन टॅक्सी वेवसाय चालू उरचो हे खातीर सरकार धोरण हाडटा. कॅब एग्रिगेटर्स हे धोरण न्हय तर अधिसुचोवणीचो मसुदो जावन आसा. एकदा राज्य धोरण आयलें काय हें धोरण कॅब अधिसुचोवणीची सुवात घेतले आनी ती अधिसुचोवणी रद्द जातली, अशें मुख्यमंत्र्यान म्हणले.
टॅक्सीकारांक बरोबर घेवनच धोरणाचो मसुदो तयार करपाचे तशेंच हे धोरण आयलें उपरांत टॅक्सी एग्रीगेटर्स धोरण रद्द करपाचे आश्वासन मुख्यमंत्र्या कडल्यान मेळला, अशे टॅक्सी संघटनेच्या प्रतिनिधींनी बसके उपरांत सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
