भांगरभूंय | प्रतिनिधी
पणजी : आम आदमी पक्षान गोंयच्या रस्त्याचेर ‘बीजीपीचो बुराक’ हें आंदोलन सुरू केल्लें. राज्यांतल्या खड्डे पडिल्ल्या रस्त्यांचेर आंदोलन केलें. हाका लागून न्हिदिल्ल्या सरकाराक रोखडीच जाग आयली. हाका लागूनच आतां विवीध सुवातांचेर फोंडकुलां पुरोवपाचें काम सुरू जाल्ल्याचें आपचे प्रदेशाध्यक्ष अमित पालेकार हांणी सांगलें. शुक्रारा पणजे जाल्ले पत्रकार परिशदेंत ते उलयताले. ह्या वेळार वाल्मिकी नायक आनी श्रीकृष्ण परब हेय हजर आशिल्ले.
बीजीपीचो बुराक आंदोलना खातीर सुरू केल्ले हॅल्प लायनीक बरो प्रतिसाद मेळ्ळो. हाचो अर्थ रस्त्यावेल्या फोंडकुलांक जनता उबगल्या. मांद्र्यां आंदोलन केले उपरांत फकत दोनूच वरांनी फोंड पुरोवपाचीं कामां सुरू जालीं. अशेंच पणजी, कालापुर, पर्वरे, मयें, कुडतरी, काणकोणाय आंदोलन जाले उपरांत कामाक सुरवात जाल्या. हातुंतल्यान अशें स्पश्ट जाता, आपान जनतेच्यो समस्या हातांत घेतल्यार सरकारूच न्हय तर हेर विरोधी पक्षांकूय जाग येता.
राज्यांत अती पावस आशिल्ल्यान रस्त्यांचेर खड्डे पडिल्ल्याचें सांगतात. मात नवें तंत्रज्ञान वापरून बरे रस्ते करप शक्य आसा. सरकार हे विशीं गंभीर ना. सगल्या आमदारांनी दुचाकी वेल्यान पर्वरी ते म्हापश्यां हो प्रवास केल्यार खरी परिस्थिती समजतली. वायट काम केल्ल्या प्रकरणांत आतां मेरेन फकत एकाट कंत्राटदाराक काळे वळेरेंत घाला. मुळांत रस्त्यांचे दुर्दशे विशीं कंत्राटदार, बांधकाम अभियंते हांचेर खर कारवाय जावपाक जाय, अशें तांणी मुखार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
