भांगरभूंय | प्रतिनिधी
मडगांव : पुलिसांनी आपल्या खांकी गणभेसाचो मात्सो तरी मान राखचो. पुलीस संचालकांनी हाची गंभीर दखल घेवची. पुलिसांनी आपलो धाक गुन्यांवगारांक दाखोवपाची गरज आसा. आदले गृहमंत्री रवी नायक सध्याच्या मंत्रिमंडळांत आसात. कांयच जायना जाल्यार तांचे कडेन गृह खातें दिवचें, अशें आमदार विजय सरदेसाय हांणी सांगलें.
राज्यांतल्या फारपेटीच्या घडणुकांचेर उलयतना आमदार सरदेसाय हांणी, मुंगूल फारपेट जाले उपरांत मडकय फारपेट जालो. पुलीसांकूय बडयतना पळोवंक मेळटा. कुडचडेच्या एका पुलिसाक मारपेट जाल्लो, ताचेर गुन्यांवूय नोंद करूंक ना. ही स्थिती हुस्को करपा सारकी आसा. पुलीस खात्यांत राजकारण्यांचो हस्तक्षेप वाडत आसा. हाका लागून बर्या पुलीस अधिकार्यांक पोस्टींग मेळना. शिफारस नासल्यार, तशेंच राजकी हात नासल्यार ताका बरें पद मेळपाकूच शकना. हाका लागून बरे पुलीस अधिकारी राखीव दळांत आसात आनी सरकाराचे चमचे आशिल्ले पदांचेर. हाका लागून गुंडांक उर्बा मेळटा. गोंयकारपण राखून दवरपाक विरोधकांनी कायदो आनी सुवेवस्थेच्या प्रस्नाचेर उलोवपाची गरज आसा. लोकांमदींय जागृती करपाची गरज आशिल्ल्याचें तांणी सांगलें.
मुख्यमंत्री सावंत हांचे कडेन गृह खात्या सयत वट्ट ४५ खातीं आसात. हाका लागून सगल्या खात्यांच्या कारभारा कडेन लक्ष दिवप तांकां शक्य जायना. मुख्यमंत्री आसतना गृह आनी वित्त खातें आपणा कडेन नाशिल्लीं, अशें दिगंबर कामत हांणी सोपूत विधी वेळार सांगिल्लें. तांणी मुख्यमंत्र्यांक गृह आनी वित्त खातें सोडपाचो सरळ निर्देशूच दिल्ल्याचो अर्थ ताच्या त्या उलोवपांतल्यान समजता, अशेंय सरदेसाय हांणी म्हणलें.
मुंगूल फारपेट प्रकरणांत सत्ताधारी कार्यकर्त्यांचो आसपाव आशिल्ल्याचो आरोप आमदार सरदेसाय हांणी केलो. ह्या प्रकरणां सगल्या दुबावितांक पुलिसांनी धरूंक नात. खोलायेन तपास केल्यार भाजपाचे कार्यकर्ते भितर घुस्पल्ल्याचे दिसतलें. कांय दुबावितांक अटक करुन दुबावितांचे सुवातेर साक्षीदार केल्यात. जांणी केल्या तांकां बरी पोस्टींग मेळटली, अशें सरदेसाय हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
