भांगरभूंय | प्रतिनिधी
आयज दनपारां भजनी उत्सवाची सांगता; फेरी उरतली 9 ऑगस्ट मेरेन
वास्को: 123वो वास्कोचो सप्ता भक्तीमय, उत्साही आनी खोशयेच्या वातावरणांत काल (बुधवारा) दनपारच्यान सुरू जालो. उद्देजक प्रशांत जोशी हांणी श्री देव दामोदर हांच्या चरणांत श्रीफळ दवरले उपरांत ‘श्री रामनाथ दामोदर महाराज की जय’ असो जयघोश केलो. उपरांत ‘जय जय राम कृष्ण हरी’च्या गजरान 24 वरांचो अखंड भजनी सप्ताची सुरवात जाली. भजनी उत्सवाची सांगता बिरेस्तारा दनपारां गोपळकाल्या उपरांत जातली. सप्ताची फेरी 9 ऑगस्ट मेरेन उरतली.
कोविडाचे फाटभुंयेर फाटलीं दोन वर्सां धर्मीक आनी मर्यादीत स्वरुपांत वास्को सप्ता मनयिल्लो. पूण अंदूंचो 123वो वास्को सप्ता भौशीक रितीन मनोवपाचो निर्णय घेतलो. ते प्रमाण फाटले कांय दीस नेटान तयारी सुरू आशिल्ली.
2वेर वास्को सप्ताच्या आदल्या सांजवेळा आयोजीत केल्ल्या जयतीर्थ मेवुंडी हांच्या संगीत गायनाक रसिकांची व्हड हाजेरी आशिल्ली. काल फांतोडेर सावन भाविकांनी देवदर्शना खातीर रांगो लायिल्ल्यो. दनपारां श्रींच्या चरणांत श्रीफळ दवरले उपरांत भजनी कलाकार अशोक मांद्रेंकार, बाबू गडेकार आनी हेर भाविकांच्या गजरान 24 वरांच्या सांखळी भजनाक सुरवात जाली. वास्कोतल्या विवीध वाठारांतलीं भजनी पथकां सांखळी पद्दतीन भजन करतले.
अंदूं फेरयेंत दुकानां घाल्ले विक्रेते आनी भाविकूय सुखावल्यात. कायदो आनी सुवेवस्थेचो प्रस्न निर्माण जावचो न्हय म्हूण स्वातंत्र्य पथ आनी सेंट वाझ मार्गार टेळणी मनोरे उबारल्यात. दक्षीण गोंयांतल्या विवीध पुलीस स्टेशना वयले पुलीस बंदोबस्ता खातीर तैनात केल्यात. भाविकांची गैरसोय जावची न्हय हे खातीर थळावें प्रशासक, उत्सव समिती खबरदारी घेत आसात. भाविकांक वाहनां पार्क करपा खातीर कांय खास सुवातो राखून दवरल्यात. सप्ता निमतान मुरगांव हिंदू समाजान आयोजीत केल्ल्या अन्नप्रसादाचो लाव भाविकांनी घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
