भांगरभूंय | प्रतिनिधी
पणजी: कॅब एग्रीगेटर्स विशीं मुख्यमंत्री डॉ. प्रमोद सावंत हांणी टॅक्सी संघटनेच्या पदाधिकार्या वांगडा खाशेली बसका आपयल्या. टॅक्सी एप एग्रीगेटर्स विशीं जे टॅक्सीकारांचे विशय आसात हे जाग्यार घालपाचो यत्न हे बसके वेळार जातलो. बसकेंत येरादारी मंत्री मावीन गुदीन्हो सयत दर्यादेग वाठारांतले आमदार हजर आसात.
टॅक्सी एप एग्रीगेटर्सांचो फुडार थारावपी ही म्हत्वाची बसका. ह्या वेळार दक्षीण आनी उत्तर गोंयां सावन शेंकड्यांनी टॅक्सीकार आपल्या शिश्टमंडळाक तेंको दिवपा खातीर मंत्रालया भायर हजर आशिल्ले. तशेंच हे बसकेंत रेंट अ कॅब, मोटर सायकल पायलट आनी रिक्षा धनी संघटनेचे प्रतिनिधी हजर आसात.
येरादारी मंत्री मॉवीन गुदीन्हो सयत ज्या आमदारांक टॅक्सी विशय लागता ते कळंगुटेचे आमदार मायकल लोबो, पेडणेंचे आमदार प्रवीण आर्लेकार, मांद्रेंचे आमदार जीत आरोलकार, बाणावलेचे आमदार वेन्झी व्हिएगस आनी सांत आंद्रेचे आमदार विरेश बोरकार हजर आसात.
टॅक्सी एग्रीगेटर्स विशीं आमका हेर राज्यां वांगडा पावलार पावल दवरुन चलपाक जाय. आमकां हो विशय बरे भशेन सुटावो करपाक जाय. फकत एकेच बसकेंत न्हय आनी दोन तीन बसका उपरांतूच हांचो सोक्षमोक्ष लागतलो, अशें मावीन गुदीन्हो हांणी बसका सुरू जावचे पयलीं सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
