भांगरभूंय | प्रतिनिधी
फोंडेंः मंत्रीमंडळांत नव्यान नेमणूक जाल्ल्या वरिश्ठ वांगडी दिगंबर कामत आनी आदले सभापती रमेश तवडकर हांच्या अभ्यासाचो आनी अणभवांतल्यान आमच्या सरकाराक निश्चीत फायदो जातलो, अशें मत वीज मंत्री सुदीन ढवळीकार हांणी उक्तायलां.
हे संबंदी ते फुडें सांगतात, फाटलीं 27 वर्सां दिगंबर कामत सतत वेंचून येता. मुख्यमंत्री पदाचेरय ताणें काम केलां. ताणें म्हत्वाच्या विभागांचो अभ्यास केला. ताचो फायदो आमच्या सरकाराक निश्चीत जातलो.
चळवळींतल्यान एसटी समाजांतल्यान भायर सरिल्ले रमेश तवडकार हे फुडारी. मानादीक मुख्यमंत्र्यान तांकां दुसरे खेपे मंत्रीपद दिवपाचो योग्य निर्णय घेतला. त्या दोगां मंत्र्यां वांगडाच आयज मुख्यमंत्र्यांकय परबीं फावो.
रमेश तवडकर हांच्या श्रमधाम येवजणे विशीं उलयतना मंत्री ढवळीकार हांणी सांगलें, दरेक आमदार गरीबांक घरां बांदून दिवपाचो पुराय यत्न करता. कांय प्रतिनिधी फकत आपल्या मतदारसंघाचोच विचार करतात जाल्यार रमेश तवडकार हांणी आपल्या मतदारसंघा भायर वचून गरीबांक घरां बांदल्यात. आयज पुराय गोंयांत जंय जंय गरज आसा थंय ताणें श्रमधाम येवजणे वरवीं लोकांक वण्टी आनी पांख्यांची वेवस्था केल्या. गरीब मनशाक आलाशिरो दिवपा सारको दुसरो सद्गुण ना. चार वण्टीं खातीर झगडपी मनशाक पांखे दिवपी मनशाचें रीण गरीब मनीस केन्नाच विसरना. आयज भाजपान ताच्या निस्वार्थी वावराची दखल घेतली आसतली अशें दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
