भांगरभूंय | प्रतिनिधी
पणजी : पक्षाच्या आदेशाक लागून खूबच जड मनान हांवें सभापतीपद सोडपाचो निर्णय घेतलो. 2027 चे वेंचणुकेचेर नदर दवरून पक्षान हो निर्णय घेतला. पक्ष तशेंच लोकां खातीर वावर करपाक मंत्रीपद जाय पडटा. सगल्यांनी एकठांय जावन वावर केलो जाल्यार 2027 चे
स्पश्ट भोवमत मेळपा सयत दक्षीण गोंयांत लेगीत पक्षाक व्हड येस मेळप शक्य जातलें, अशें मंत्री रमेश तवडकार हांणी म्हणलां.
बिरेस्तारा सकाळीं सभापतीपदाचो राजीनामो दिले उपरांत तांणी मंत्रिपदाचो सोपूत घेतलो. ह्या वेळार तांणी ह्यो भावना उक्तायल्यो.
भारतीय जनता पक्षाचो कार्यकर्तो म्हूण बरींच वर्सां हांवें वावर केला. सर्गेस्त मनोहर पर्रीकार हांचे हाता खाला लेगीत हांवें वावर केला. 29 मार्च 2022 दिसा हांवें सभापतीपदाचीं सुत्रां हातांत घेतलीं. साडेतीन वर्सां हांव सभापती आसलों. सभापती म्हूण मुख्यमंत्री, मंत्री आनी आमदारांनी म्हज्या कार्याची तोखणाय केली. हाका लागून सभापतीपद सोडटना म्हाका खूब वायट दिसता. सभापती आसतना पक्ष संघटणे खातीर वावर करप शक्य जायना. 2027 चे वेंचणुकेचेर नदर दवरून पक्षान म्हाका मंत्रिपद घेवपाचो आदेश दिलो. आतां मंत्री म्हूण बरो वावर करपाक म्हजें प्राधान्य आसतलें, अशें श्री. तवडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
