भांगरभूंय | प्रतिनिधी
चर्चा करून मुख्यमंत्री खात्यां विशीं निर्णय घेतले
पणजी : वट्ट 13 वर्सां उपरांत म्हजो मंत्रिमंडळांत आसपाव जाल्ल्यान हांव खूब खोशी जालां. खात्या विशीं आजूनय चर्चा जावंक ना. हांव मुख्यमंत्री आशिल्लों तेन्ना अर्थ आनी गृह हीं म्हत्वाचीं खातीं म्हजे कडेन नाशिल्लीं, हाचो हांव उगडास करून दितां. म्हजे कडेन चर्चा करून मुख्यमंत्री खात्या विशीं निर्णय घेतले, अशें भाजपाचे म्हालगडे फुडारी दिगंबर कामत हांणी मंत्रिपदाचो सोपूत घेतले उपरांत सांगलें.
ज्येश्ठ आमदार आशिल्ले कामत हे जायतीं वर्सां मंत्री उरले. सुरवातेक फ्रान्सीस सार्दीन हांच्या सरकारांत ते वीजमंत्री आशिल्ले. उपरांत स. मनोहर पर्रीकार हांच्या मंत्रिमंडळांत ते मंत्री आशिल्ले. 2005 वर्सा भाजप आमदारकेचो राजीनामो दिवन तांणी कॉंग्रेसींत प्रवेश केलो. 2007 ते 2012 ह्या कार्यकाळांत ते कॉंग्रेसीचे मुख्यमंत्री आशिल्ले. 2012 उपरांत आतां 13 वर्सांनी ताका मंत्रिपदाची संद मेळ्ळ्या.
मंत्रीपद मेळिल्ल्यान जनतेची सेवा आनीक नेटान करप आपल्याक शक्य जातलें. केंद्रीय गृहमंत्री अमित शहा, राष्ट्रीय अध्यक्ष जे. पी. नड्डा, मुख्यमंत्री डॉ. प्रमोद सावंत आनी प्रदेश भाजप अध्यक्ष दामू नायक हांकां लागूनच म्हजो मंत्रिमंडळांत आसपाव जालो. जो मनीस ह्यान पयलीं मुख्यमंत्री पदार आशिल्लो, तो खात्या विशीं आग्रो कित्याक धरतलो? खात्या विशीं मुख्यमंत्री म्हजे कडेन चर्चा करतले. मुख्यमंत्री आसतनाय अर्थ आनी गृह हीं म्हत्वाचीं खातीं म्हजे कडेन नाशिल्लीं, असो उगडास तांणी करून दिलो.
दिगंबर कामत हांच्या मुख्यमंत्रीपदाच्या कार्यकाळांत आदले मुख्यमंत्री रवी नायक हे गृहमंत्री आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
