भांगरभूंय | प्रतिनिधी
हांव कामा खातीर गेल्लो महाराष्ट्रांत : मायकल लोबो
पणजी : दिगंबर कामत आनी रमेश तवडकार हांच्या सोपूत विधी सुवाळ्याक मायकल लोबो, दिलायला लोबो आनी गोविंद गावडे हे आमदार गैरहाजीर आशिल्ले. हेर मंत्री, आमदार, पक्षाचे पदाधिकारी, सरकारी अधिकारी आनी कार्यकर्ते हांकां लागून दरबार हॉलांत गर्दी जाल्ली. ह्या तीन आमदारांचें मात दर्शन जालें ना.
हांव एके कार्यावळीक लागून महाराष्ट्रांत गेल्लो. दनपरां गोंयांत पावलां. दिगंबर कामत आनी रमेश तवडकार हांकां परबी दिवपी संदेश हांवें धाडला. दोगांकूय हांव परबीं दितां, अशें आमदार मायकल लोबो हांणी सांगलें. शिवोले मतदारसंघांत एके कार्यावळीक लागून आमदार दिलायला लोबो सोपूत विधी हाजीर रावंक शकली ना, अशी म्हायतीय तांणी दिली.
सोपूत विधी सुवाळ्याचे सगळे मंत्री, आमदार, वरीश्ठ सरकारी अधिकारी हांकां निमंत्रण आशिल्लें. मुरगांवचे आमदार संकल्प आमोणकार हांचें उसरां दरबार हॉलांत दर्शन जालें. कार्यकर्त्यांनी बरीच गर्दी केल्ली.
फाटलो बरोच तेप मंत्रिमंडळ फेरबदलाची चर्चा चलताली. मायकल लोबो, दिलायला लोबो तशेंच संकल्प आमोणकार हांकां मंत्रिपद मेळटलें, अशी चर्चा आशिल्ली. अधिवेशना पयलीं मायकल लोबो हांणी दिल्लीक केंद्रीय गृहमंत्री अमित शहा हांची लेगीत भेट घेतिल्ली. गैरहाजेरी फाटल्यान नाराजी आशिल्ल्याची चर्चा आसा. गोविंद गावडे हांचें मंत्रीपद गेल्ल्यान रमेश तवडकार हांकां मंत्रिपदाची संद मेळ्ळी. मंत्रीपद गेल्या उपरांत कार्यकर्त्यांची सभा घेवन गावडे हांणी आपली नाराजी जाहीरपणान उक्ती केल्ली.
पणजी भाजपा मंडळाची महालक्ष्मी मंदिरात सत्यनारायण पूजा आशिल्ल्यान मंत्री बाबुश मोन्सेरात सोपूतविधीक पावंक नात. आमदार जेनिफर मोन्सेरात आनी महापौर रोहित मोन्सेरात हाजीर आशिल्ले.
इतले मजगती पणजेच्या महालक्ष्मी मंदीरात सत्यनारायण पूजा आशिल्ल्यान येणावळ मंत्री बाबूश मोन्सेरात हे लेगीत सोपुतविधी सुवाळ्याक हाजीर रावंक शकले ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
