भांगरभूंय | प्रतिनिधी
अमेरिका महासत्ता म्हणटकच संवसारांतल्या देशांक आपले मुठींत दवरपाची इत्सा तांकां पयलीं सावन आसा. रासायनीक हत्यारां आसात, असो आरोप करून तांणी सद्दाम आनी इराक सोंपयलो. वर्ल्ड ट्रेड सेंटराचेर हल्लो जातकच अफगाणिस्तान काबार केलें. थंय आतां तालिबान राज्य करता. ते अमेरिकेक आयकनात. चीन, रशियेक कितें म्हणपाचें धाडस अमेरिकेक ना. कारण हे देश अमेरिकेच्या न्हेसणाकूच हात घालतले. तिसऱ्या संवसारीक झुजाची ती नांदी थारतली. प्रत्येक देशाच्या अंतर्गत प्रस्नांत धवळाधवळ करून अमेरिकेन सगल्यांचेंच वायटपण घेतलां. तांची लश्करी, अर्थीक मजत जाता म्हूण भोवतेक देश ओगी आसात. आतां अमेरिकेन व्हेनेझुएला देशा लागसार तीन आधुनीक झुजाबोटी उब्यो केल्यात. घुंवळे वखदांचो वेव्हार आनी ताचे कडेन संबंदीत हिंसाचार आडावपाक आमी हें पावल उखल्लां अशें राष्ट्राध्यक्ष ट्रम्प सांगतात. व्हेनेझुएलाचें सरकार ड्रग्स तस्करी तेंको दिता, असो आरोपूय तांणी केला. दुसरे वटेन हे आरोप न्हयकारून व्हेनेझुएलान बोटी आसात त्या वाठारांत आपलें सगलेंच सैन्य हाडून उबें केलां. आमी ड्रग्साच्या वेव्हारांत नात, अशें राष्ट्राध्यक्ष निकोलस मादुरो हांचो दावो. हो संघर्श सोंपता काय वाडटा, ताचे कडेन संवसाराचें लक्ष आसतलें.
बळिश्टान दुबळ्याक गिळचो, हो संवसाराचो न्याय. क्युबाक सोंपोवपाचो खर यत्न अमेरिकेन सातत्यान केलो. पूण फिदेल कॅस्ट्रो तांकां पुरून उरलो. आतां क्युबाचो इश्ट व्हेनेझुएला आड (लॅटिन अमेरिकन देश) अमेरिका उबी रावल्या.
अमेरिकेन धाडिल्ल्यो तिनूय बोटी, सैन्य ह्या वाठारांत ड्रग्स तस्करी आडचे मोहिमेंत वांटो घेतलें. आमचे कडेन शांतिकाय, भावचार आसा. एका स्वतंत्र देशाक अमेरिका अशी बागोवपाक शकना, अशें व्हेनेझुएलाचे विदेश मंत्री यवान एदुआर्द गील पिंटो हांणी म्हणलां. अमेरिकेन बारा दिसां पयलीं मादुरोंचेर 435 कोटींचे (भारतीय चलनांत) इनाम लायलां. तांची स हजार कोटींची मालमत्ताय जप्त केल्या. ते संवसारांतले सगल्यांत व्हडले ड्रग्स तस्कर अशें तांकां दिसता. ते ड्रग्साच्या जिवार अमेरिकेंत आतंकवादी घडणुको घडोवन हाडटात, असोय अमेरिकेचो दावो. मादुरोंचेर अमेरिकेंत केश चलता. ट्रम्प हांणी ड्रग्सां आड भुमिका घेतल्या काय तांच्या मनांत भलतेंच कितें आसा, तें कळना. व्हेनेझुएला अमेरिकेंत फक्त भिरांकूळ घुंवळे वखदां हाडिनात, तर शारा- शारांनी हिंसाचाराक उर्बा दिता, असो आरोप ट्रम्प हांणी केला. मेक्सिकोंतूय ड्रग्स माफिया आसात. तांचेर कारवाय करची अशी शिटकावणी अमेरिकेन दिल्या. ताचेर, आमी सार्वभौमत्वा कडेन तडजोड करचे नात, अमेरिकेचो लश्करी हस्तक्षेप सोंसून घेवचे नात, अशी शिटकावणी राष्ट्राध्यक्ष क्लावडिया शीनबाॅम हांणी दिला. अमेरिकेन स म्हयन्यां पयलीं व्हेनेझुएला, एल साल्वादोरांतल्या 1- 1 तर मेक्सिकोंतल्या स ड्रग्स कार्टेलांक आतंकवादी संघटना म्हूण घोशीत केल्यात. आतां मेरेन हें फक्त आयसीस आनी अल कायदाच्या बाबतींत जाल्लें. ह्यो टोळयो ड्रग्स आनी मनशांची तस्करी आनी हिंसाचार करतात. ताचो वायट परिणाम अमेरिकेचेर जाला, अशें ट्रम्प हांचें म्हणणें. कोलंबिया, पेरू, बोलिव्हीया ह्या देशांत कोकेनाचें विक्रमी उत्पादन, वेव्हार जातात. अफगाणिस्तान अफू, हेराॅयनांत मुखार आसा. म्यानमारूय मुखार येवपाक लागलां. मेक्सिकोंत सिंथेटिक्स ड्रग्स तयार जाता. चीनांतल्यान कच्चो म्हाल येता, अशें जाणकारांचें मत.
घुंवळे वखदांची संवसारीक उलाढाल वाडत आसा. वर्साक सादारण 652–852 अब्ज डाॅलर ह्या धंद्यां वरवीं मेळटात. आमच्या देशांत 22 ते 25 हजार कोटी रुपयांचें ड्रग्स जप्त जाता. हाचे दुपेट तपास यंत्रणांच्या नदरेंतल्यान सुट्टा आसतलें. ही आयात, निर्गत उणी जावंक ना, तर वाडत आसा.
अमेरिकेन ड्रग्स, ताका लागून जावपी हिंसाचार ह्या एका कारणां खातिरूच विवीध देशां आड लश्करी मोहीम सुरू केल्या काय दुसरो कसलो हेतू आसा?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
