भांगरभूंय | प्रतिनिधी
आरोलकार : भंडारी समाजांतल्या विद्यार्थ्यांचो भोवमान
भांगरभूंय । विशेश प्रतिनिधी
पेडणें : तरणाट्यांनी शिक्षण घेवन व्हड जावन समाजांतल्या दुबळ्या घटकां खातीर काम करचें. जे वरवीं फुडले पिळगेक ताचो आदर्श निर्माण जातलो. शिक्षण मळार आयज सर्त आसा. हे सर्तींत तिगचे खातीर विवीध तरांचें ज्ञान आत्मसात करप गरजेचें आसा, अशें मांद्रेंचे आमदार जीत आरोलकार हांणी सांगलें. पेडण्यां आयोजीत केल्ले पेडणें म्हाल गोमंतक भंडारी समाजाच्यो शिश्यवृत्ती आनी भोवमान सुवाळ्यांत ते मुखेल सोयरे म्हूण उलयताले.
ह्या सुवाळ्या वेळार माचयेर कार्यावळीचे अध्यक्ष शिवकुमार महादेव आरोलकार, अध्यक्ष पेडणें म्हाल गोमंतक भंडारी समाज, खाशेले सोयरे आदले मंत्री दयानंद मांद्रेंकार, पेडणें नगराध्यक्ष मनोज हरमलकार, पेडणें उपनगराध्यक्ष उषा नागवेकार, मांद्रेंचे आदले सरपंच तशेंच सध्याचे पंच प्रशांत (बाळा) नायक, खाशेली उपस्थिती सरचिटणीस दत्ताराम नायक, भांडारी प्रवीण वायंगणकार, उपाध्यक्ष दीपक शिरोडकार, मुखेल सल्लागार श्रीधर मांजरेकार, सल्लागार मनोहर म्हामल जोडसचीव अनील म्हामल, जोडभांडारी संतोष पाळणी, इब्रामपूर ग्राम समिती अध्यक्ष संदेश शिरोडकार, कार्यकारी समिती वांगडी आनी पेडणेंचे आदले नगरसेवक प्रशांत गडेकार, वांगडी तुळशीदास केरकार हाजीर आशिल्ले.
भंडारी समाजांतल्या विद्यार्थ्यांनी शिक्षण घेतना व्हड मोख मेळोवचे खातीर खर मेहनत घेवची. समाजाची उदरगत करून हेर तरणाट्यांक प्रेरणा दिवची. आमी कोणा कडेन सर्त करता, हेंवूय म्हत्वाचें आसा. आपसात सर्त करूं नाका, अशें आरोलकार हांणी सांगलें.
आदले मंत्री दयानंद मांद्रेंकार हांणी सांगलें, आयज गोंयांत 55 टक्के परस चड भंडारी समाज आसा. मात ह्या समाजाचेर वेळावेळार अन्याय जातना दिसता. सगल्यांनी एकवटान वावर केलो जाल्यार अन्याय पयस जातलो. जे विद्यार्थी शिक्षणांत पर्जळीत येस मेळयतात, तांचो दर वर्सा भोवमान करतात. पेडणें म्हाल भंडारी समाजाचो बरो वावर आसा, अशें तांणी सांगलें. अश्या बऱ्या उपक्रमा खातीर आपलो सदांच तेंको आसतलो, अशेंय तांणी सांगलें.
ह्या वेळार मनोज हरमलकार, उषा नागवेंकार, प्रशांत नायक, शिवकुमार आरोलकार आनी हेर मानेस्तांचीं उलोवपां जालीं.
ह्या सुवाळ्यांत आमदार आरोलकार आनी हेर मानेस्तांचे हस्तुकीं गोवा शालांत मंडळान घेतिल्ल्या धावी, बारावी तशेंच गोंय विद्यापिठान घेतिल्ले पदवी आनी पदव्युत्तर परिक्षेंत येस मेळयल्ल्या विद्यार्थ्यांचो रोख रकम, यादस्तीक चिन्न दिवन भोवमान केलो. पेडणें म्हालांतचल्या भंडारी समाजांतल्या विद्यार्थांनी गोंय वैजकी मळार पदवी मेळोवन डॉक्टर पदवी तशेंच अभियंता आनी हेर मळार येस मेळयिल्ल्या विद्यार्थ्यांचो खास भोवमान केलो. पेडणें म्हाल भांडारी समाज सरचिटणीस दत्तराम नायक हांणी सुत्रसंचालन केलें जाल्यार दीपक शिरोडकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
