भांगरभूंय | प्रतिनिधी
पणजी : गोंयांत चलपी बेकायदेशीर धिरयो (रेड्यांचें वा बैलांचे झूज) आडावपा खातीर सरकारान म्हत्वाचो निर्णय घेतला. पशुसंवर्धन आनी पशुवैजकी सेवा संचालनालयान काडिल्ले अधिसुचवणे प्रमाण राज्यांतले सगले बैल आनी रेड्यांक मायक्रोचीप बसोवन आनी नोंदणी करून घेवप स्कतीचें केलां.
मुंबय उच्च न्यायालयान बैलांच्या झुजाक (धिरयांक) बेकायदेशीर आशिल्ल्याची घोशीत केल्लें. उपरांत जायते फावट ते मोडप जालें. पीपल फॉर ऍनिमल्स, गोंय संस्थेन दाखल केल्ले अवमान याचिके उपरांतूय सरकारान आतां ह्या कायद्याची खर कारवाय करपाचें थारायलें. धिरयांचेर कारवाय करपाक उत्तरेक मांद्रें, आगशे समिती स्थापन केल्या.
सरकाराचो आदेश कितें म्हणटा?
-रेडे वा बैलांच्या धनयांनी आपल्या जनावरांक विभागीय पशुवैजकी अधिकार्या कडल्यान मायक्रोचीप बसोवन नोंदणी करून दिवची. हे खातीर अधिसुवणी प्रसिद्ध जाल्ले पसून एका म्हयन्याची मुजत दिल्या.
-संबंदीत पुलीस निरीक्षकांनी आपले हद्दींत हें काम वेळार पुराय करपाची खात्री करची.
-वेळार नोंदणी करूंक नाशिल्ले रेडे तशेंच बैल धनयांक बेकायदेशीर धिरियांनी वांटेकार जावपाचो हेतू आशिल्ल्याचें गृहीत धरतले.
-नोंदणी नाशिल्लेे बैल आनी रेडे जप्त करून ते गोशाळेंत धाडटले.
-पांच नेम मोडप्यांक ५० हजार रुपयांचो दंड दितले. हो दंड गोशाळेंत तीन म्हयन्यांच्या देखभाल खर्चा इतलोच आसा.
हो आदेश पशुसंवर्धन आनी पशुवैजकी संचालक डॉ. वीणा कुमार हांणी काडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
