भांगरभूंय | प्रतिनिधी
कामांचेर लक्ष दवरपाक करतले समिती स्थापन
मडगांव : मडगांव रवींद्र भवनाचें दुरुस्तीचें काम ऑक्टोबर निमाणें मेरेन म्हळ्यार फुडल्या ६० दिसांनी पुराय करपाचें लक्ष्य आसा. कामांची पळोवणी करपा खातीर कलाकार विजय केंकरे हांचे अध्यक्षते खाला समिती स्थापन केल्या, अशी म्हायती रवींद्र भवनाचे अध्यक्ष राजेंद्र तालक हांणी मडगांवां पत्रकार परिशद घेवन दिली.
हे पत्रकार परिशदे वेळार तालक हांचे सयत उपाध्यक्ष मनोहर बोरकार, वांगडी सचीव सीमा दळवी हजर आशिल्ले.
तालक हांणी मुखार सांगलें, फकत कांय जाण वींद्र भवनाच्या कामा विशीं चुकीच्यो गजाली उलयतात. तांणी हे सुवातेर येवन परिस्थिती जाणून घेवपाची गरज आसा. आमदार दिगंबर कामत आनी मुख्यमंत्री डॉ. प्रमोद सावंत हांच्या फुडाकारान आतां रवींद्र भवनाच्या देखभाल दुरुस्तीच्या कामांक सुरवात केल्या. हें काम फुडल्या साठ दिसांनी पुराय करतले. ऑक्टोबर निमाणें मेरेन रवींद्र भवनाचें काम पुराय जातलें. रवींद्र भवनांतलीं कामां करतना, मुखेल सभाघराचें काम पयलीं हातांत घेतले. तशेंच ब्लॅक बॉक्स आनी एनेक्स इमारतीचें कामूय करतले. सगले कलाकार, निर्माते, दिग्दर्शक हांकां विस्वासांत घेवन हो निर्णय घेतला. ह्या कामांचेर नदर दवरपा खातीर विजय केंकरे हांचे अध्यक्षते खाला प्रशांत वराडकार, राजन भिसे हांचे सयत बांदकाम खात्याचे अभियंते आशिल्ली समिती स्थापन केल्या. दर पंदरा दिसांनी ही समिती कामांचो आढावो घेवन कामां थारचीं नात हाची जतनाय घेतली. तशेंच रवींद्र भवना कडल्यानूय गरजेची मजत करतले, अशेंय स्पश्ट केलें.
के. वैकुंठ जल्मशताब्दी मनयतले: तालक
रवींद्र भवना कडल्यान कोंब मडगांवां सिनेमाटोग्राफर वैकुंठ कुंकळ्येंकार (२१ ऑगस्ट १९२५) हांची जल्मशताब्दी मनयतले. जानेवारी २०२६ वर्सा तीन दिसांचो फिल्म फेस्टिवल मनयतले. त्या वेळार गुलझार, रमेश सिप्पी, हेमामालिनी ह्या कलाकारांक हाडपाचो विचार आसा. तशेंच संगीतकार अँथनी गोन्साल्वीस, फिल्म एडिटर भानुदास दिवकार, पेंटर लक्ष्मण पै आनी मारिओ मिरांडा हांची जल्मशताब्दीय मनयतले अशे तालक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
