खटल्याच्या निवाड्या उपरांत राजकी समिकरणां बदलपाची शक्यताय

भांगरभूंय | प्रतिनिधी

मॉवीन गुदिन्हो, बाबूश मोंसेरात हांचे आड न्यायालयांत चलता खटलो

मंत्रीपदाच्यो दोन सुवातो रित्यो जावपाची शक्यता

पणजी: पंचायत मंत्री मॉवीन गुदिन्हो हांचे आडचें वीज भानगड प्रकरण आनी बाबूश मोंसेरात हांचे आडच्या लैंगीक अत्याचार प्रकरणाच्या निवाड्या उपरांत गोंयच्या राजकी समीकरणांत बदल जावपाची शक्यता आसा. न्यायालयाचो निवाडो कोणाचे वटेन लागता हाचेर सगलें निंबून आसा. तरी चवथी उपरांत मंत्रीपदाच्यो आनीक दोन सुवातो रित्यो जावपाची शक्यताय आसा.

गोविंद गावडे हांकां मंत्रीपदा वेल्यान काडिल्ल्यान एक सुवात रिती आसा. सभापती रमेश तवडकार हांचो रोखडोच मंत्री म्हूण सोपुतविधी जातलो. सभापतीपदा खातीर पर्यायी नांव निश्चीत जावंक नाशिल्ल्या कारणान तांच्या सोपुतविधीची तारीख निश्चीत जावंक ना.

गोंयांत मंत्रीमंडळ फेरबदल जावप निश्चीत आसा. हे फाटभुंयेर न्यायालयीन निवाड्यांक लागून आनीक दोन मंत्रीपदाच्यो सुवातो तयार जावप शक्य आसा. वीज सवलत भानगड प्रकरणांत आरोपी आशिल्ले पंचायत मंत्री मॉवीन गुदिन्हो हांचे आड उत्तर गोंय जिल्हाे आनी सत्र न्यायालय 25 ऑगस्टाक निवाडो दितलें. ह्या खटल्यान पंचायत मंत्री मॉवीन गुदिन्हो दोशी थारल्यार तांचे मंत्रीपद वतलें. न्यायालया कडल्यान दोशी थारिल्ल्या मनशाक मंत्रीपदाचेर दवरप सरकाराक परवडचें ना. मॉवीन गुदिन्हो निर्दोश सुटत जाल्यार मात तांच्या मंत्रीपदाक कसलोच धोको आसचो ना.

जी स्थिती मॉवीन गुदिन्हो हांची आसा तशीच स्थिती येणावळ खात्याचे मंत्री बाबूश मोंसेरात हांची आसा. लैंगीक अत्याचार प्रकरणांत बाबूश मोंसेरात हे आरोपी आसात. ह्या खटल्यांत उत्तर गोंय अतिरिक्त जिल्हाे सत्र न्यायालय 3 आनी 8 सप्टेंबराक निमाणी सुनावणी घेतलें. ह्या खटल्यातलो निवाडो बाबूश मोंसेरात हांचे आड वचत जाल्यार तांचेंय मंत्रीपद घाताक येतलें. बाबूश मोंसेरात हे निर्दोश सुटत जाल्यार मात तांचे मंत्रीपद शाबूत उरतलें. न्यायालयाचे निवाडे कोणा वटेन लागतात हाचेर सगलीं समीकरणां निंबून आसात.

उद्देगांक वीज दरांत सवलत दिवपा विशीं वीज मंत्री आसतना मॉवीन गुदिन्हो आनी हेरां आड 1998 वर्सा कागाळ नोंद जाल्ली. कागाळी उपरांत गुन्यांव नोंद जावन तपास जालो आनी आरोपपत्र दाखल जालें. आरोपपत्र रद्द करपाची मागणी सर्वोच्च न्यायालयान लेगीत भायरायल्या.

बाबूश मोंसेरात हांचे आड 2016 वर्सा बलात्कार केल्ल्याची कागाळ चलयेन केल्ली. बायलां पुलिसांनी 2018 वर्सा आरोपपत्र दाखल केल्लें. ह्या आरोपपत्राचेर आतां निमाणी सुनावणी जातली.

न्यायालयांत मंत्री दोशी थारत जाल्यार ताचे मंत्रीपद वचप ख्यास्तीचेर निंबून आसता. ख्यास्त दोन वर्सां परस चड जाली जाल्यार ताचे मंत्रीपद वता. ख्यास्तीचो कालावधी उणो आसत जाल्यार ताचे मंत्रीपद वचना. मात नैतीक जापसालदारीतल्यान ताका काडपाचो निर्णय मुख्यमंत्री घेवंक शकता. मात ख्यास्तीक वयल्या न्यायालयान अंतरीत स्थगिती दिल्यार लेगीत कायद्यान मंत्रीपद शाबूत उरता अशी म्हायती नामनेचे आदवोगाद अॅड. क्लिओफात कुतिन्हो आल्मेदा हांणी दिली.