गिल उप मुखेली, बुमरा-जितेशाचीय निवड

भांगरभूंय | प्रतिनिधी

आशिया करंड क्रिकेट सर्ती खातीर भारताच्या 15 वांगड्यांच्या पंगडांत शुभमन गिलाक संद दिल्या. तशेंच ताका पंगडाचो उप मुखेली केला. मुंबय बीसीसीआयचे मुखेल कचेरेंत जाल्ले बसके उपरांत पंगडाची घोशणा केली. सूर्यकुमार यादवाच्या फुडारपणाखाला खेळपी पंगडांत संजू सॅमसन आनी अभिषेक शर्मा हांची लेगीत निवड केल्या. पूण, गिलाक उप मुखेली केल्या उपरांत तोच डावाची सुरवात करपाक शकता हाची शक्यताय वाडल्या.

यशस्वी जयस्वाल आनी श्रेयस अय्यर हांकां संद मेळपाक शकता अशें जाणकारांक दिसतालें. पूण, तशें जावंक ना. अंदूंचे आयपीएलांत श्रेयसान 175चे स्ट्रायक रेटीन 604 धांवड्यो केल्ल्यो तशेंच पंजाब किंग्साक फायनली मेरेन पावयिल्लो.

फास्ट बॉलर जसप्रीत बुमराचें पुनरागमन जालां. जाल्यार जितेश शर्माचो विकेटकीपराच्या रुपांत पंगडांत आस्पाव केला. अंदूंचे आयपीएलांत बंगळुरू रॉयल चॅलेंजर्सा वतीन खेळटना ताणें जबरदस्त प्रदर्शन केल्लें. तशेंच बॉलींग विभागांत हर्षित राणाक संद दिल्या.

गिल आनी अभिषेक डावाची सुरवात करता जाल्यार जितेशाक विकेटकीपर म्हणून निमाण्या इकरांत सुवात मेळुये. अक्षर पटेल, हार्दिक पांड्या आनी शिवम दुबे हांच्या रुपान तीन अश्टतासांच्या खेळगड्यांची निवड केल्या. तज्ञ बॉलर म्हणून बुमरा आनी हर्षित हांचे खेरीत अर्शदीप सिंग, कुलदीप यादव आनी वरुण चक्रवर्ती हांकां संद दिल्या.

आशिया करंड सर्तींत आठ पंगड वांटो घेतले. पयलीं गट पांवड्यार मॅची जातल्यो. उपरांत सुपर चार दोन फायनलींत खेळपी पंगड वेंचतले.

अ गटांत भारत, पाकिस्तान, यूएई आनी ओमान जाल्यार ब गटांत अफगाणिस्तान, श्रीलंका, बांगलादेश आनी हॉंगकॉंग ह्या पंगडांचो आसा.

पयलीं मॅच 9 सप्टेंबराक अबु धाबींत अफगाणिस्तान आनी हॉंगकॉंग ह्या पंगडां मदीं मॅच जातली. भारत आपली पयली मॅच 10 सप्टेंबराक यूएई आड खेळटलो. भारत आनी पाकिस्तान ह्या पंगडां मदलीं मॅच 14 सप्टेंबराक दुबय जातली. पंगडः सूर्यकुमार यादव (मुखेली), शुभमन गिल (उप मुखेली), संजू सॅमसन, अभिषेक शर्मा, तिलक वर्मा, रिंकू सिंह, हार्दिक पांड्या, शिवम दुबे, कुलदीप यादव, अक्षर पटेल, जितेश शर्मा, हर्षित राणा, अर्शदीप सिंह, वरुण चक्रवर्ती आनी जसप्रीत बुमरा.

राखीव खेळगडेः प्रसिद्ध कृष्णा, वॉशिंगटन सुंदर, रियान पराग, ध्रुव जुरेल आनी यशस्वी जयस्वाल.