भांगरभूंय | प्रतिनिधी
लग्न करिनासतना एकठांय रावपाचें (लिव्ह इन रिलेशनशीशप) फॅड हालीं खूब वाडलां. चड करून शारांत रावपी उच्च शिक्षीत तरणाटे, तरणाट्यो हांचे मदीं लिव्ह इन रिलेशनशिपांत रावपाचें प्रमाण चड आसा. लिव्ह इन रिलेशनशिपांत कांय म्हयने रावन पळोवप. जर एकामेकांचो सभाव पटलो जाल्यार बरें आसा, नाजाल्यार ब्रेक अप करून परतून नवो जोडिदार सोदून ताचे बराबर लिव्ह इन रिलेशनशिपांत रावप असो हो प्रकार. जांकां लग्नाची संस्था मान्य ना वा लग्न करपाचें ना अशे तरणाटे आनी तरणाट्यो लिव्ह इन रिलेशनशिपाक म्हत्व दितात. फक्त आंकवार तरणाटेच न्हय जाल्यार घटस्फोटीत व्यक्ती लेगीत लिव्ह इन रिलेशनशिपांत रावपाक पसंती दितात.
लिव्ह इन रिलेशनशीप हाचे कडेन लग्न संस्थेक पर्याय म्हूण पळोवपी मोटो वर्ग समाजांत निर्माण जायत आसा. भारतीय कायद्यान लिव्ह इन रिलेशनशिपाक पुरायपणान मान्यताय दिल्ली नासली तरी लिव्ह इन रिलेशनशीप कायद्यान बेकायदेशीर वा गुन्यांवूय थारायिल्लो ना. भारतीय कायद्यान ह्या नात्याक कांय प्रमाणांत राखण आनी अधिकारूय दिल्यात. पूण हें करतना कायद्यान कांय मार्गदर्शक तत्वांय जारी केल्यांत. लिव्ह इन रिलेशनशिपांत रावपी जोडप्यां खातीर हीं मार्गदर्शक तत्वां पाळप बंधनकारक आसा. अशें आसलें तरी ह्या मार्गदर्शक तत्वांक संबंदीत जोडपीं पाळो दितात? हो संशोधनाचो विशय आसा. मुळांत लिव्ह इन रिलेशनशिपाची व्याप्तीच इतली अस्पश्ट आसा की आपल्या अधिकाराची आनी कर्तव्याची लक्ष्मणरेशाच जोडप्यांक समजना. ताका लागून अशा संबंदां मदीं कालांतरान कोडूसाण निर्माण जाता. दोगांचेंय पटना अशें जाता. लग्नाच्या संबंदां मदीं एकामेका विशीं जो आदर, विस्वास आसता तो लिव्ह इन रिलेशनशिपांत नासता. दोगूय एकामेकांचेर अधिकार गाजोवपाचो यत्न करतात. ताका लागून वाद वाडत वतात. तांचे मदीं मध्यस्ती करपीय कोण नासता. हाका लागून प्रकरण न्यायालया मेरेन पावता.
लिव्ह इन रिलेशनशिपांत रावपी जोडप्यांचो न्यायालयांत पावपाचो प्रकार हालींच्या दिसांनी खूब वाडला. एखादो वाद न्यायालयांत पावलो की न्यायालयाची सोंपणां झरोवचीं पडटात. ताका लागून संबंदितांची जीण लेगीत उध्वस्त जाता. सोयऱ्यां मदीं, समाजा मदीं विटंबणा जाता. कांय वेळार जाल्यार वाद इतलो तेंगशेक पावता की वादांतल्यान खून लेगीत जाता. दोन वर्सां पयलीं दिल्लींतल्या श्रद्धा वालावलकार हे तरणाटे चलयेचो तिच्याच लिव्ह इन रिलेशनशिपांतल्या जोडिदारान निर्घृणपणान खून केल्लो. ते घडणुकेन पुराय देश हादरिल्लो. दिल्लींतले हे घडणुके उपरांत पुण्यांतूय असोच प्रकार जालो. लिव्ह इन रिलेशनशिपांतल्यो ह्यो घडणुको पळयत जाल्यार लिव्ह इन हातूंत रावप कितलें सुरक्षीत आसा हाचो विचार तरणाट्यांनी करूंक जाय.
लिव्ह इन रिलेशनशिपाक कायद्यान बेकायदेशीर थारायिल्लें नासलें तरी समाजान अजूनय ह्या नात्याक मान्यताय दिल्ली ना. समाजान अजून लेगीत लिव्ह इन रिलेशनशिपाक स्विकारिल्लें ना. लिव्ह इन रिलेशनशिपांत रावपी जोडप्यां कडेन समाज वायट नदरेनूच पळयता. म्हणल्यार ज्या सुखा खातीर लिव्ह इन रिलेशनशिपाचो मार्ग स्विकारला तें सूख वांट्याकूच येना. उरफाटें दुख्खच वांट्याक येता. खरें म्हणल्यार लिव्ह इन रिलेशनशिपाक फक्त कायद्याचे नदरेंतल्यान पळयनासतना समाजीक आनी नैतीक दृश्टीकोनांतल्यान पळयत जाल्यार कोणूच लिव्ह इन रिलेशनशिपाचें समर्थन करचो ना. बायल आनी दादलो एकामेकांक पुरक आसतात आनी ते पुरकतायेक घटाय दिवपा खातीरच अनादी काळा सावन लग्न संस्था अस्तित्वांत आयल्या. लग्न हें मानवी संस्कृतायेचो अविभाज्य भाग आसा. लग्न संस्कृतींत कांय त्रुटी आसतूय बी, लग्न जाल्ल्या जोडप्यां मदीं पटना, तांचे मदीं वाद जायना अशें कोणूच म्हणचो ना. घोव- बायले मदीं वाद जाताच. कांय जाणांचो वाद न्यायालयांतूय वता. कांय जाणांचो घटस्फोट लेगीत जाता म्हणून लग्न नाका, लिव्ह इन रिलेशनशीप लग्न संस्थेक पर्याय आसा अशें कोणूय समजता आसत जाल्यार तें चुकीचें आसा.
लिव्ह इन रिलेशनशीप लग्न संस्थेक पर्याय थारूंक शकना. लिव्ह इन रिलेशनशिपांत दोन वेगळीं वेगळीं लिंगी व्यक्ती एकठांय रावतात, पूण तांकां एकामेकां मदलें जापसालदारकेचें भान नासता. हाचें उरफाटें लग्न जाल्ल्यां मदीं एकामेकांप्रती जापसालदारकीचें भान आसता आनी ती फक्त जापसालदारकीच न्हय जाल्यार प्रेम, त्याग आनी तडजोडी बराबरच लग्नांत समर्पण भावनाय आसता. पूण अस्तंती संस्कृतायेचीं कुड्डेंपणां, भौतीकवादी दृश्टीकोन, हेरां परस कितें तरी वेगळें करून दाखोवपाची प्रवृत्ती हाका लागून शारांनी चड करून मेट्रो शारांनी लग्न संस्थेचेरूच प्रहार करतात.
आयची उच्च शिक्षीत तरणाटी पिळगी खंयच्याय जापसालदारके बगर बंधनमुक्त जीण जगपाक इत्सूक आशिल्ल्याचें पळोवंक मेळटा. ताका लागूनच लिव्ह इन रिलेशनशीप हाचे कडेन वळटात. पूण तेवूय अटी आनी शर्तीचेर बेतिल्लें आशिल्ल्यान ते संबंद लेगीत चडसो काळ तिगून उरनात. ताचे परस समानता, प्रेम, त्याग आनी जापसालदारकीची जाणीव आशिल्लें लग्न लिव्ह इन रिलेशनशिपा परस हजारांनी पटींनी बरें. हें लिव्ह इन रिलेशनशीप हाचे कडेन वळिल्ल्या तरणाट्यांनी समजून घेवंक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
