भांगरभूंय | प्रतिनिधी
नव्यो वेवसाय संद निर्माण करपाक २१ वेर विशेश मेळावो
पणजी, : डेल्टा पोर्ट्स मुरगांव टर्मिनल प्रायव्हेट लिमिटेड आनी मुरगाव बंदर प्राधिकरण हांचे वतीन तशेंच गोंय उद्देगीक विकास महामंडळ (गोवा-आयडीसी) च्या सहकार्यान २१ ऑगस्टाक नोवोटेल- पणजे वेपार परिशदेचें (ट्रेड मीट २०२५) आयोजन केलां.
मुरगांव बंदरांतल्यान कंटेनर शिपिंगच्या पुनरुज्जीवनाचें प्रतीक म्हणल्यार हो उपक्रम. ह्या उपक्रमांतल्यान संवसारीक वेपारांतलें एक मुखेल वेपार केंद्र म्हणून आनी भारतांतलें लॉजिस्टीक मळावेलें एक सर्त दिवपी केंद्र म्हणून गोंय राज्याची वळख घटमूट करपाचेर हे परिशदेंत भर दितले.
मेळाव्या वरवीं गोंय राज्याच्या सागरी आनी वेपारी मळावेल्यो नव्यो वेवसायीक संधी सोदपा खातीर बांदील आशिल्ले उद्देग मळावेले फुडारी, बंदर प्राधिकरणाचे पदाधिकारी, लॉजिस्टिक मळावेले वेवसाय एके माचयेर येतले.
मुखेल सोयरे म्हणून उद्देग मंत्री माविन गुदिन्हो; मुरगांव पोर्ट ट्रस्टाचेर चेअरमन डॉ. एन. विनोदकुमार, आयडीसीचे चेअरमन आलेक्स रेजिनाल्ड लॉरेन्स; डेल्टा पोर्ट्स मुरगाव टर्मिनल प्रायव्हेट लिमिटेडचे चेअरमन अहमद मोहिउद्दिन; गोवा-आयडीसीचे वेवस्थापकीय संचालक प्रविमल अभिषेक (आयएएस); आनी डेल्टा पोर्ट्स मुरगांव टर्मिनल प्रायव्हेट लिमिटेडचे वेवस्थापकीय संचालक शमील अहमद हजर आसतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
