भांगरभूंय | प्रतिनिधी
मडगांव : फातोड्डेंच्या श्रीनिवास थोरावत ह्या रिअल इस्टेट वेवसायिकान पुलीस स्टेशनांत कांय जाणांनी दोन कोटींची खंडणी मागिल्ल्याची कागाळ दिल्ली. ते प्रमाण तपासा वेळार पुलिसांनी चार दुबावितांक अटक केली.
ह्या प्रकरणांत तिरुपती वारकुरी आनी हेर एका अनवळख्या आड थोरावत हांणी कागाळ दिल्या. ते कागाळी प्रमाण, लेबर कंत्राटदार आशिल्ल्या तिरुपती हांचे कडेन २०१७ वर्सा वळख जाली. तांचे वांगडा आगाळेंतल्या एका अपार्टमेंटाचें काम करीत मे २०१९ वर्सा कामाचे पयशेय दिले. उपरांत बाणावलेच्या एका बंगल्याचेंय काम हातांत घेतिल्लें, ते सुवातेवेले कामाचे पयशे वेळार दिले तरी कामाक कळाव केलो. तांणी केल्ल्या कामा परस चड पयशे दिल्ले. जानेवारी २०१४ वर्सा तिरुपतीन आपणा कडेन १.३० कोटी किमतीचो बेळगांवच्या नव्या प्रकल्पांतलो फ्लॅट दिवपाची मागणी केली. मात ताका न्हयकार दिलो. १३ ऑगस्टाक वळखीच्या नसीर शेख हाचो कॉल आयलो आनी तांणी तिरुपतीच्या सांगण्यान कांय कुटुंबियांचेर नदर दवरून आशिल्ल्याचें सांगून तांका मेळपाक सांगलें. १४ ऑगस्टाक चौगुले कॉलेजी लागसार हॉटेलांत थोरावत हांकां मेळपाक आपयिल्लें.
तिरुपती आनी तांचे वांगडा आशिल्ल्या अनवळखी मनशांनी वॉल्टरचे सहकारी आशिल्ल्यान आपले पुलिसां कडेनूय लागींचे संबंद आसात. दोन कोटी दिना जाल्यार कुटुंबीयांच्या सुरक्षिततेचो प्रस्न निर्माण जावपाची धमकी दिली. हे विशीं कारवाय करपाची आनी कुटुंबीयांक सुरक्षा दिवपाची मागणी केल्ली.
हे विशीं फातोर्डा पुलिसांनी तपासा मजगतीं दुबावीत तिरुपती वारुकरी, वॉल्टर फर्नांडीस, रोहित फळदेसाय आनी विनोद थोताड हांकां अटक केल्या. ह्या प्रकरणांत वॉल्टर फर्नांडीस हांचे कडलें पिस्तोलूय पुलिसांनी जप्त केलां. हाचे फुडलो तपास चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
