भांगरभूंय | प्रतिनिधी
पणजी : गोंयांत फाटल्या पर्यटन हंगामांत मुरगांव बंदर प्राधिकरणाच्या (एमपीए) क्रूझ टर्मिनलाचेर 38 क्रूझ बोटी धक्यार लागल्यात. ह्या बोटींतल्यान 67 हजार परस चड पर्यटक गोंयांत पावल्यात. गोंयांत क्रूझ पर्यटनाक उर्बा दिवचे खातीर केंद्र सरकारान क्रूझ भारत मिशन चालीक लायलां, अशी म्हायती केंद्रीय केंद्रीय बोट, बंदर आनी न्हंय येरादारी मंत्री सर्बानंद सोनावाल हांणी लेखी जापेंत दिल्या.
राज्यसभेचे खासदार सदानंद शेट तानावडे हांणी राज्यसभेंत विचारिल्ल्या प्रस्नाक लेखी जाप केंद्रीय मंत्री सोनावाल हांणी दिल्या.
1 जानेवारी 2024 ते 30 जून 2025 ह्या काळांत गोंयांतल्या एमपीए बंदरा वयल्या क्रूझ टर्मिनलाचेर 38 क्रूझ बोटी धक्याक लागून ह्या बोटींतल्यान 67,594 पर्यटक गोंया पावल्यात. ह्या क्रूझ बोटींतल्यान सरकाराक 4.82 कोटी रुपयांचो महसूल आयला.
गोंयांत क्रूझ पर्यटनाक उर्बा दिवपा खातीर 30 सप्टेंबर 2024 ह्या दिसा भारत सरकारान क्रूझ भारत मिशन भारत सरकारान सुरू केलां. ह्या मिशन अंतर्गत धोरण, नियमन आनी क्रूझ मळार संबंदीत वेगवेगळ्या पैलू सयत अंतर मंत्रालय साचो तयार करता. तशेंच संबंदीत नियमन एजन्सी देखीक कस्टम, इमिग्रेशन, सीआयएफ, राज्य पर्यटन खातें, राज्य मेरिटायम एजन्सी, जिल्हो प्रशासन आनी थळाव्या पिलिसांक आस्पावन घेता. ह्या मिशनाचे कामगिरीचो नियाळ घेतल्यार ह्या उपक्रमा खाला 2029 मेरेन चार लाख नोकऱ्यो तयार करपाची मोख दवरल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
