भांगरभूंय | प्रतिनिधी
पुलीस महासंचालकांची शिटकावणी
मडगांंव : मुंगूलच्या फारपेट प्रकरणांतल्या दुबावितांक दक्षीण गोंय पुलिसांनी अटक केल्या. गुन्यांवकारां विशीं खर भुमिका घेवन पुलिसांनी ह्यान फुडें अशे गँगवॉराचे प्रकार खपोवन घेवचे नात, असो स्पश्ट संदेश दिला. मुखारूय कायदो सुवेवस्था राखपा खातीर पुलिसांची कारवाय चालूच उरतली, अशी म्हायती पुलीस महासंचालक आलोक कुमार हांणी दिली.
पुलीस महासंचालक कुमार हांणी मडगांवच्या दक्षीण गोंय जिल्लो मुख्यालयांत बसका घेतली. ह्या वेळार दक्षीण गोंय पुलीस उपअधीक्षक सिध्दांत शिरोडकार हांचे वांगडा पुलीस निरीक्षक हजर आशिल्ले. ह्या वेळार दक्षीण गोंयच्या गँगवॉरचे घडणुके सयत पुलिसांक जाल्ल्या मारपेटाचो आढावो घेतलो.
उपरांत आलोक कुमार हांणी, मुंगूलचे फारपेटीचे घडणुके विशींच्या सगल्या घडणुकांची आनी जाल्ले अटके विशीं म्हायती घेतली. ह्या प्रकरणांत आतां मेरेन जाल्ली कारवाय आनी ह्यान फुडें खंयची कारवाय करतले हाची म्हायती घेतली. गँगवॉर प्रकरणांत पुलिसांनी खर भुमिका घेवन दुबावितांक अटक केल्या. हे कारवायेंतल्यान गोंयांत ह्यान फुडेंय अशे तरेचे प्रकार खपोवन घेवचे नात, असो संदेश गुन्यांवकारांक दिला. तशेंच राज्यांत कसलेच तरेचो कायदो आनी सुवेवस्थेचा प्रस्न निर्माण जावपाक दिवचो ना. हे खातीर खर पुलीस बंदोबस्त करतले.
नोंद नाशिल्ल्या सुरक्षा एजन्सींचेर जातली कारवाय
सुरक्षा एजन्सी विशीं मुख्यमंत्री डॉ. प्रमोद सावंत हांणी दिल्ल्या निर्देशा प्रमाण नोंदणीकृत एजन्सी विशींची म्हायती जारी केल्या. नागरिकांनीय नोंदणीकृत आशिल्ल्या सुरक्षा एजन्सीकडल्यान सुरक्षा रक्षकांची नेमणूक करची. हाचे भायर नोंदणीकृत नाशिल्ल्या सुरक्षा एजन्सीची वळख पटोवन तांचेर कायदेशीर कारवाय करतले, अशें पुलीस महासंचालक आलोक कुमार हांणी सांगलें.
गँगवॉरचेर पुलिसांची कारवाय सुरु
राज्यांत ल्हान ल्हान गँगची निर्मिती जावपाच्या प्रस्नाचेर आलोक कुमार हांणी, अशे तरेचे गुन्यांव आडावपा खातीर दक्षीण गोंय, उत्तर गोंय आनी गुन्यांव फांट्या वतीन खर पावलां उबारतात. तशेंच कुंकळ्ळी पुलिसांक मारपेट केल्ल्या सगल्या दुबावितांक अटक केल्ल्यान ह्यान फुडें अशे प्रकार जावचे न्हय म्हूण सुचवण्यो दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
