भांगरभूंय | प्रतिनिधी
पणजी : घराक उजो लायिल्ल्याच्या प्रकरणांत प्रत्यक्षदर्शी साक्षीदार नाशिल्ल्या दुबाविता आड कसलेच तरेचे पुरावे नात, अशें निरीक्षण नोंद करून अतिरिक्त सत्र न्यायालयान दुबावीत करण चोडणकार हाची पुराव्यांच्या उणावाक लागून निर्दोश सुटका केली. हे विशींचो आदेश मेरशेच्या अतिरिक्त सत्र न्या. विजया आब्रे हांणी दिलो.
नेमकें प्रकरण कितें?
लिओपोल्डिना पोरोब हांणी ५ नोव्हेंबर २०२४ दिसा कागाळ दाखल केल्ली. ते प्रमाण ३१ ऑक्टोबर २०२४ दिसा मध्यानरातचें सुमार ३.३० वरांचेर कागाळदाराच्या सोनारवाडो – हणजुणच्या भुमिका देवस्थाना लागसारच्या घराक उजो लागिल्लो. तो उजो पालोवपी दळान येवन पालयलो. हातूंत कागाळदाराचें सुमार २७ लाख रुपयांचें सामान लासून गोबोर जाल्लें. हो उलो कागाळदाराचो सोयरो दुबावीत करण चोडणकार हांणी लायिल्ल्यान दुबावीत फाटल्या कांय दिसां सावन उजो पालोवपाची धमकी दितालो, असो दावो कागाळींत केला.
हाची दखल घेवन हणजूण पुलिसांनी १७ नोव्हेंबर २०२४ दिसा गुन्यांव दाखल करून दुबावीत करण चोडणकार हाका अटक केल्ली. उपरांत पुलिसांनी तपास पुराय करून ९ जानेवारी २०२५ दिसा न्यायालयांत आरोपपत्र दाखल केलें. उपरांत न्यायालयान ७ मे २०२५ दिसा प्रथमदर्शनी पुराव्याची दखल घेवन दुबावीत चोडणकार हाच्या आड आरोप निश्चीत करून खटलो सुरु केलो.
हाचे मजगतीं न्यायालयान २७ जून २०२५ दिसा दुबाविताची सशर्त जामिनाचेर सुटका केली. हे विशीं न्यायालयांत सुनावणी जाली तेन्ना दुबाविता वतीन ऍड ए. नायक हांणी बाजू मांडली. तातूंत तांणी ही घडणूक ३१ ऑक्टोबर २०२४ दिसा घडिल्ली. तेन्ना उजो लायतना दुबावीत थंय हजर आशिल्ल्याचें प्रत्यक्षदर्शी साक्षीदार वा हेर कसलेच तरेचे पुरावे सादर करूंक ना. तशेंच घडणूक घडले उपरांत पांच दिसांनी कागाळ दाखल केली. तशेंच घडणुके उपरांत १७ दिसां उपरांत गुन्यांव दाखल करून आपल्या अशिलाक अटक केल्या. हाका लागून कळावा विशीं कसलेच तरेची म्हायती न्यायालयांत सादर करूंक ना. असो युक्तिवाद करून करण चोडणकार निर्दोश आशिल्ल्याचो दावो केलो. ह्या प्रकरणांत न्यायालयान दोनूय बाजू आयकून घेतले उपरांत वयलें निरीक्षण नोंद करून दुबाविताची सुटका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
