बिट्स पिलानी कॅम्पसांत फाटल्या आठ म्हयन्यांत चवगांची आत्महत्या

भांगरभूंय | प्रतिनिधी

वास्को: सांकवाळ- झुआरीनगरच्या बिट्स पिलानी कॅम्पसांत थर्ड इयराच्या वर्गांत शिकपी कुशाग्र जैन (२०) हो विद्यार्थी शेनवारा आपले कुडींत खांटीचेर मरण आयिल्ले सांपडलो.ह्यान पयलीं डिसेंबर २०२४ ते मे २०२५ मजगतीं बिट्स पिलानी कॅम्पसांत तीन विद्यार्थ्यांनी आत्महत्त्या करपाची घडणूक घडल्या. हाका लागून पुराय कॅम्पसांत भिरांत पातशळ्ळ्या. तेन्ना आदले राज्यपाल पी. एस. श्रीधरन पिल्लई हांणी अहवाल मागिल्लो. उपरांत बिट्स पिलानी वेवस्थापक मंडळान जायत्यो सुविधा आनी सुधारणा केल्ल्यो.
शेनवारच्या प्रकरणा उपरांत पयले सुवातेर हें मरण सैमीक आशिल्ल्याचें दिसून आयिल्ल्याचें वेर्णा पुलिसांनी सांगलें. हे विशीं फुडली चवकशी करतात.
कुशाग्र जैन हो मुळचो लखनौ- उत्तर प्रदेशचो. कुशाग्र हो नांवा प्रमाण बुद्धीनय कुशाग्र आशिल्लो. ताका फाटल्या सेमिस्टरांत बरे गूण मेळिल्ले. बेगीनूच फुडल्या सेमिस्टरचे वर्ग सुरु जावपाचे आशिल्ल्यान तो कॅम्पसांत परतल्लो. वर्ग सुरु जावंक नाशिल्ल्यान अभ्यासाचो आनी मानसीक ताणाचो प्रस्न नाशिल्लो.

विद्यार्थ्यांचो पंगड
बिट्स पिलानी कॅम्पसांत ह्यान पयलीं जाल्ल्या तीन आत्महत्या प्रकरणांक लागून वेवस्थापन मंडळान दरेकी धा विद्यार्थ्यांचो आसपाव आशिल्लो एक पंगड तयार केला. ह्या पंगडाचो मुखेली तशेंच हेर एकामेकाच्या संपर्कांत आसतात. हाका लागून शेनवारा (ता. १६) सकाळीं तो नदरेक पडूंक नाशिल्ल्यान, तशेंच तांचे कडल्यान मोबायलाचेर कसलेच तरेचो प्रतिसाद मेळनाशिल्ल्यान संबंदीत विद्यार्थ्यांनी आपल्या प्राध्यापकांक म्हायती दिली. उपरांत थंय धांवपळ सुरू जाली. तांच्या कुडीच्या दारार मारलें. मात भितरल्यान कसलेच तरेचो प्रतिसाद मेळनाशिल्ल्यान कोणेंतरी ल्हान जनेलांतल्यान भितर पळयलें. तेन्ना कुशाग्र आपले खांटीचेर पडून आशिल्ल्याचें दिसलें. दोतोरान ताका तपासलो. तेन्ना ताका मरण आयिल्ल्याचें समजलें.
पुलीस उपअधीक्षक गुरुदास कदम हांच्या मार्गदर्शना खाला उपनिरीक्षक आनंद शिरोडकार फुडलो तापस करतात. कांय जाणांच्या मता प्रमाण कुशाग्राचो बापूय शुक्रारा ताचे कडेन संपर्क करपाचो यत्न करतालो. तेन्ना तांकां कसलोच प्रतिसाद मेळूंक ना. कुशाग्र हांच्या मरणा विशी तांच्या कुटुंबाक कळयले उपरांत ताचीं कांय सोयरीं गोंयांत पावल्यांत.