भांगरभूंय | प्रतिनिधी
पणजी ः एनएसयूआयाचे गोंय अध्यक्ष नौशाद चौधरी हांणी काँग्रेसीचे प्रदेशाध्यक्ष अमित पाटकार हांचेर मारपेट केल्ल्याचो आरोप केला. एनएसयूआयच्या राष्ट्रीय अध्यक्षांक बरयल्ल्या पत्रांत तांणी पाटकार हांचेर गाळयो घालून मारपेट केल्ल्याचो आरोप केला.
प्रदेशाध्यक्ष अमित पाटकार हांणी 14 ऑगस्टाक पणेजच्या काँग्रेस भवनाच्या गेटीचेर आपल्याक गाळयो घालून मारपेट केल्ल्याचो आरोप एनएसयूआयचे गोंयचे अध्यक्ष नौशाद चौधरी हांणी केले. हे संबंदी तांणी एनएसयूआयचे राष्ट्रीय अध्यक्ष वरुण चौधरी हांकां पत्र बरोवन पाटकार हांचेर खर कारवाय करपाची मागणी केल्या. कारवाय जाली ना जाल्यार पुलिशेंत कागाळ करतलो अशें चौधरीन सांगलां.
14 ऑगस्टाक मत चोरये आड मेणवातीच्या मोर्चांत वांटो घेवपाक पणजेच्या काँग्रेस हावसांत आयिल्लो अशें नौशाद चौधरी हांणी पत्रांत सांगलां. ह्या वेळार म्हडे वांगडा एनएसयूआयचे गोंयचे प्रभारी वैष्णवी भारद्वाज आशिल्ले. काँग्रेस हावसाच्या सोपणांचेर हांव आनी पाटकार मेळ्ळे. पाटकार हांणी अचकीत म्हाका तापोवपाक सुरवात केली.
तुमी म्हाका तुमच्या कार्यावळींक कित्याक आपयना? एनएसयूआय गोंय प्रभारी गोंयांत आयला हें कित्याक सांगूंक ना? अशे प्रस्न विचारपाक सुरु केलें. हांवें ताका सांगलें, तुमकां जायते फावटीं फोन केलां पूण तूं उखललो ना. हाचेर पाटकार तिडकलो आनी म्हाका सोपणां सकयल धुकल्ले आनी म्हजे आंगांर धांवून आयलो. तांणी म्हजो शर्टाचो कॉलर धरलो आनी कोंकणींतल्यान गाळयो घाल्यो. तांणी म्हणलें, तूं म्हाका वळखना, हांव कितेंय करपाक शकता, म्हापशेंत येवन दाखयतलों अशें तांणी म्हणलें.
ही घडणूक वैष्णवी भारद्वाज आनी गोवा प्रदेश काँग्रेसीचे सरचिटणीस अॅड. श्रीनिवास खलप हांचे मुखार घडलो. पक्षाच्या वरिश्ठ अधिकाऱ्या कडल्यान अशी घडणूक घडप सारकें ना. हाका लागून पक्ष कार्यकर्त्यांचें मनोबल उणें जावपाक लागलां आनी पक्षाचीय बदनामी जावपाक लागल्या. पक्षान हे गजालीची गंभीरतायेन दखल घेवन पाटकार हाचे आड खर कारवाय करची अशें पत्रांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
