भांगरभूंय | प्रतिनिधी
पणजीः सरकार गोंयचे सर्वांगी उदरगती खातीर बांदील आसा. राज्याचे पर्जळीत आनी सुरक्षीत फुडारा खातीर सरकारान सगळ्यां उदरगतीच्या मळार पावलां मारिल्ली आसा. गोंयांक स्वयंपूर्ण राज्य करपा खातीर साबार येवजण्यो चालीक लायल्यात, अशें मुख्यमंत्री डॉ. प्रमोद सावंत हांणी पणजे पोरणें सचीवालया सामकार आयोजीत राज्य पावंड्या वयल्या स्वातंत्र्य दीस सुवाळ्यांत राष्ट्रीय तिरंगो बावटो हुबयल्या उपरांत जनतेक उद्देशून उलयतना सांगलें.
गोंयची अर्थीक उदरगत ही व्हड उद्देगांचेर आदारीत आसून गोंयांत उद्देजकांक आकर्शीत करपा खातीर गुंतवणूक प्रोत्साहन मंडळा वतीन प्रोत्साहन दितात. रोजगार निर्माण करपी उद्देगांक सरकारान दारां उक्ती केल्ली आसा, अशें मुख्यमंत्र्यान सांगलें.
केंद्र आनी राज्य सरकारान मेळून गोंयांत भलायकी, शिक्षण, खेळ, उद्देग आनी हेर मळार व्हडा प्रमाणात साधन सुविधांची उदरगत केल्ली आसा. प्रशासन लोकांच्या दारां मेरेन व्हरपा खातीर सरकारान प्यत्न सुरू केल्ले आसा. लोकांच्यो अपेक्षां पुराय करून विकसीत भारताची बुन्याद घाल्ल्या. सरबराय उद्देग क्षेत्रांत कुशळ मनीसबळ उपलब्ध करपा खातीर आयटीआय संस्थांनी नवीन अभ्यासक्रम सुरू केल्यांत. तशेंच अप्रेन्टिसशीप धोरण चालीक लायला जाचो लाव तरणाट्यांक जाला, अशेंय मुख्यमंत्र्यान सांगलें.
गोंयच्या आदिवासी लोकांक जमनीचे हक्क दिवपाचे काम सरकारान केला. तशेंच सरकारान आदिवासी लोकांच्या उदरगती खातीर साबार येवजण्यो चालीक लायल्यात. दिसवड्याचेर काम करपी कामगारांच्या हिता खातीरय सरकारान येवजण सुरू केल्या. शिक्षणाच्या मळार आवश्यक साधन सुविधा निर्माण करपाचेर भर दिल्लो आसून कुजीरा स्कुल कॉम्पलेक्सा सारकिल्लो शिक्षणीक सुविधां मडगांव वाठारांत निर्माण करतले. गोंय विद्यापीठाक A+ NAAC Accreditation दर्जो फावो जाल्लो आसा. गोंय विद्यापीठ प्रकल्पांत फार्मासी, कला, गृहविज्ञान, आर्किटेक्ट, संगीत अशा महाविद्यालयां खातीर साधन सुविधां निर्माण करतले, अशेंय मुख्यमंत्र्यान सांगलें.
ह्या वेळार मुख्यमंत्र्यांच्या हस्तुकीं उत्कृश्ट सेवेखातीर सरकारी अधिकाऱ्यांक पुरस्कार आनी पदकां भेटयली. पुलीस उपमहानिरीक्षक बॉस्को जॉर्ज (निवृत्त), पुलीस उपअधिक्षक सुनिता सावंत, पुलीस उपअधिक्षक सिद्धांत शिरोडकार हांकां राष्ट्रपती पुलीस पदक भेटयले. पुलीस उपअधिक्षक विल्सन डिसौजा, पुलीस उपअधिक्षक तुषार एन. नार्वेकार आनी हेड कॉन्स्टेबल दामोदर मयेकार हांकां पुलीस पदक दिले. उजो पालोवपी दळाचे संचालक नितीन व्ही. रायकार आनी अधिकारी उल्हास गांवकार हांकां राष्ट्रपती पदक दिले. प्रविमल अभिषेक पोलुमतल, आयएएस, हांकां गौरव पुरस्कार प्रदान केलो.
तशेंच स्वयंपूर्ण गोंय उपक्रमाचें नोडल अधिकारी गोंय लोकसेवा आयोगाचे सचीव गौरेश कुर्टीकर, स्वयंपूर्ण मित्र विभागीय कृशी अधिकारी धीरज परब, विभागीय महसूल अधिकारी सेलिना रॉड्रिग्स, कोयर वेवस्थापन म्हामंडळाचे सहाय्यक वेवस्थापक डॉ. रजत चितारी, सा.बां. खात्याच्यो कार्यकारी अभियंत्यो रोझालिना बोर्जिस हांचोय भोवमान केलो.
सुवाळ्याक राज्यसभा खासदार सदानंद शेट तानावडे, महसूल मंत्री आतानासिओ मोन्सेरात, विरोधी पक्ष फुडारी युरी आलेमांव, आमदार रूडाल्फ फर्नांडिस, मुखेल सचीव डॉ. व्ही. कांदवेलू, डीजीपी आलोक कुमार, खेळां सचीव संतोष सुखदेव, हेर सरकारी सचीव, उच्च न्यायालयाचे न्यायाधिश, वरिश्ट सरकारी अधिकारी, स्वातंत्र्य सैनिक आनी हेर मानेस्त, नागरीक आनी विद्यार्थीं उपस्थित आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
