भांगरभूंय | प्रतिनिधी
मुख्यमंत्री : कोमुनिदादीन परवानगी दिल्यारूच घरां जातलीं अधिकृत
भांगरभूंय । प्रतिनिधी
पणजी : कोमुनिदाद जमनींचेर 1990 सावन अतिक्रमण सुरू जालें. कोमुनिदादीच्या कांय वांगड्यांनी पयशे घेवन जमनी दिल्यो. कोमुनिदादी सयत सरकारी जमनीचेर 80 टक्के घरां गोंयकारांचीच आसात. कोमुनिदादीन परवानगी दिली जाल्यारूच घरां अधिकृत जातलीं, अशें मुख्यमंत्री डॉ. प्रमोद सावंत हांणी स्पश्ट केलें.
स्वातंत्र दिसाचे आदले सांजेर प्रुडंट मिडियाक दिल्ले मुलाखतींत मुख्यमंत्र्यान ही म्हायती दिली. प्रुडंट मिडियाचे संपादक संचालक प्रमोद आचार्य हांणी ही मुलाखत घेतली.
अधिवेशनांतले कामगिरी संबंदांत आपूण समाधानी आसा. अधिवेशनांत जमीन सुदारणा संबंदांत म्हत्वाचे निर्णय घेतले. घर दुरुस्तीचो परवानो तीन दिसांत दिवपाचें परिपत्रक जारी केलें. तशेंच एकाच घरांत रावपी विभक्त कुटुंबांक पार्टिशन प्रमाणपत्र दितले. हाचो 99 टक्के गोंयकारांक फायदो जातलो. 1972 आदींचीं जीं घरां सर्वेचेर लागल्यांत, तांकां उपजिल्होधिकारी प्रमाणपत्र दितले. हीं घरां 100 टकिके गोंयकारांचीं आसात. सरकारी जमनी वयलीं घरां अधिकृत करपी विधेयक संमत जालें. सत्तरी, दिवचल, धारबांदोडें, सांगें वाठारांतलीं 99 टक्के सरकारी जमनी वयलीं घरां गोंयकारांचीं आसात, अशें मुख्यमंत्र्यान सांगलें.
कोमुनिदाद जमनी वयलीं घरां अधिकृत करचे आदीं कोमुनिदादीची मान्यताय घेवची पडटली. कोमुनिदादींक हरकत घेवपाचो अधिकार आसा. जमनीचे पयशे भरचे पडटले. तशेंच घर अधिकृत करचे खातीर लेगीत शुल्क भरचें पडटलें. कोमुनिदाद जमनी वयलीं घरां फुकट अधिकृत करचे नात, अशेंय मुख्यमंत्र्यान सांगलें.
गोविंद गावडे आयजूय इश्ट
गोविंद गावडे आयजूय आपलो इश्टूच आसा. पक्षशिस्तीचो भाग म्हूण कांय निर्णय घेवचे पडटात. पक्षहीत आनी राज्य हिता खातीर तांकां मंत्रीमंडळांतल्यान काडलो. आमच्या इश्टागतीच्या नात्यांत कसलोच फरक पडूंक ना. आयजूय कसलेंय काम आसत जाल्यार तो आपले कडेन चर्चा करता, अशें मुख्यमंत्री डॉ. सावंत हांणी सांगलें.
मंत्रीमंडळ हें क्रिकेट पंगडा सारकें
मंत्रीमंडळ फेरबदल हो विचार करून आनी हायकमांडा कडेन चर्चा करून करचो पडटा. मंत्रीमंडळांतली एक सुवात रिती आसा. ती भरतना फेरबदल लेगीत करतले. हाचे खातीर इल्लो वेळ लागतलो. मंत्रीमंडळ हें क्रिकेट पंगडा सारकें आसता. मंत्र्यांचे कामगिरी विशीं आपूण समाधानी आसा, अशें मुख्यमंत्र्यान सांगलें.
गँगवॉर कशेच खपोवन घेवचे नात
गोंयांत गँगवॉराचे प्रकार कशेच खपोवन घेवचे नात. गृह खात्या कडेन नोंद नाशिल्ल्यो सुरक्षा एजन्सी बंद करतल्यो. सुरक्षा एजन्सी आनी गुंडां मदीं आशिल्ल्या बऱ्यापणाक लागून गँगवॉरा कातीर प्रकार घडटात. मुंगूल वाटारांतल्या गँगवॉरांत घुस्पल्ले 90 टक्के बिगर गोंयकार अशें, मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
