भांगरभूंय | प्रतिनिधी
म्हावळिंगे कुडचिरें पंचायतींतल्यान लडयतात वेंचणूक
दिवचल: दिवचल म्हालांतल्या वन म्हावळिंगे कुडचिरें पंचायत प्रभाग संतल्यान 82 वर्सा पिरायेचे भागो भैरू वरक हें वेंचणूक रिंगणांत देंवल्यात. तांणी आपलेंच जैत जातलें असो आत्मविस्वास उक्तायला.
कुडचिरें धनगरवाडींत राबित्याक आशिल्ले भागो वरक हे ह्या धा वर्सां पयलीं पंच म्हूण वेंचून आयिल्ल्यान तांकां पंचायत वाठारांतल्या विकास प्रक्रियेचो अणभव आसा. तकलेर वैशिश्ट्यपूर्ण धनगरी तोपी आनी आपलो परंपरीक भेस घालून लोकांचे लक्ष ओडपी भागो वरक हे धनगर भाव, पंचायत विभागांतल्या लोकांच्यो समस्या सोडोवपा खातीर कार्यरत आसतात.
म्हजे कडेन अर्थीक फाटबळ ना आनी तें जाय अशेंय ना. लोक तुमचे बराबर आसत जाल्यार तुमकां आनीक कितें जाय अशे ते सांगतात.
आयजूय माळरानार परंपरीक वेवसाय करून आपलो चरितार्थ चलोवपी धनगर समाज उपेक्षितूच आसा. तरणाट्यांक रोजगार ना. परंपरीक बोकड्यो पोसून, दूद उत्पादन आदीं वेवसायाचेर संक्रात आयल्या. अशे परिस्थितींत सरकारान ह्या समुहाक मजत करपाची गरज आसून लोकांच्या समस्यांक न्याय दिवपाचे हेतून हे पिरायेंतूय हांव वेंचणूक रिंगणांत देंवला, आनी म्हाका लोकांचो तेंको मेळटलो अशें भागो भैरू वरक हांणी सांगलें.
आयज वेंचणुकेची रणनितीची व्याख्याच बदल्ल्या. हाचे पयलीं अशी सर्त नाशिल्ली, पयसोय नाशिल्लो. ताका लागून घरा कणकणीं प्रचार करून थोडोसो खर्च करून वेंचणुको जाताल्यो. आयचें चित्र वेगळें आशिल्ल्याचें मत तांणी उक्तायलें.
ह्या प्रभागांत आयजूय खूबशो समस्यो आसात. सरकारान सरकारी जमीनीचो प्रस्न, अल्वारा समस्या रोजगार हे गजालीं कडेन चड लक्ष दिवपाची गरज आशिल्ल्यांचें भागो वरक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
