भांगरभूंय | प्रतिनिधी
पणजी : भलायकी खातें वा जीएमसी कडल्यान उच्च दर्ज्याचीं, नवीं आनी म्हारग वखदां उण्यां मोलान खरेदी करचे खातीर गोंयांत वखदां मोल धोरण लागू केलां. अशें करपी गोंय हे देशांतलें पयलें राज्य थारलां. भलायकी मंत्री विश्वजीत राणे हांणी बुधवारा पणजे जाल्ले कार्यावळींत हाची घोशणा केली. ह्या वेळार खात्याची संचालक डॉ. रुपा नायक, सचीव अरूण कुमार मिश्रा, जीएमसीचे डीन डॉ. जयप्रकाश तिवारी, डॉ. अजय शर्मा, प्रशांत वारीयार हाजीर आशिल्ले.
मंत्री राणे हांणी सांगलें, आमी गोंयांतल्या लोकांक बऱ्या दर्ज्याची भलायकी सेवा दिवपाचो यत्न करतात. आमी उण्या मोलांत बऱ्या दर्ज्याचे उपचार निमाणे व्यक्ती मेरेन पावयतात. हाचोच एक भाग म्हूण वखदां आनी वैजकी उपकरणां उण्या मोलांत उपलब्ध जावचीं हे खातीर मोल धोरण सुरू केलां. हे वरवीं पेटंट आशिल्लीं म्हारग वखदां उण्यां मोलांत खरेदी करतले. अशीं वखदां चड करून कांक्र आनी हेर दुर्मीळ दुयेंसां वयलीं आसतलीं.
नव्या धोरणाक लागून वखदां आनी हेर उपकरण खरेदींत चड पारदर्शकता येतली. ते खातीर सीएनएसएस खरेदी प्रक्रिया सगल्यां खातीर उक्ती आसतली. तातूंत खात्याचो कसलोच गुपीत हेतू ना. वखदां खरेदी करचे खातीर बाजारांत तेच पद्दतीचें वखद उण्या मोलांत उपलब्ध ना हाची खात्री खात्याचे दोतोर करतले. जीं वखदां उण्यांत उण्या मोलांत मेळटली, ताचीच खरेदी करतले. ते खातीर त्या वखदां निर्मिती कंपनी वांगडा समजिकाय कबलात करतले, अशें मंत्री राणे हांणी सांगलें.
बेगीन निदाना खातीर एआयचो वापर
भलायकी खात्यान फुफ्फुसाच्या कांक्राचें निदान करचे खातीर एआय तंत्रज्ञानाचो वापर सुरू केला. एआयक लागून दोतोरांक पयल्याच पांवड्याचेर कांक्रीचीं लक्षणां वळखुवप सोंपें जालां. बेगीन निदान जालें जाल्यार ताचेर उपचार लेगीत बेगीन सुरू करप शक्य जाता, अशें मंत्री विश्वजीत राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
