भांगरभूंय | प्रतिनिधी
कारवार ः अंमलबजावणी संचालनालयाच्या (ईडी) बेंगळुरू क्षेत्रीय कार्यालयान कारवारचे काँग्रेस आमदार सतीश कृष्ण सैल आनी हेरां विशीं लोखण खनिजाच्या बेकायदेशीर निर्यात प्रकरणांत मनी लॉन्ड्रिंग विरोधी तपासाचो भाग म्हूण बुधवारा व्हड कारवाय केली. हातूंत गोंय, कर्नाटक आनी मुंबयत मेळून 15 सुवातांचेर धाड घाली.
ईडीच्या सूत्रांनी दिल्ले म्हायती प्रमाण, सतीश सैल हांचेर बेलकेरी बंदराचेर रानां खात्यान जप्त केल्ल्या लोखण खनिजाची बेकायदेशीर निर्यात केल्ल्याचो आरोप आसा. ह्या प्रकरणांत बेकायदेशीर निर्यातीचें मोल कोट्यांनी आसूं येता असो अदमास आसा. ह्या प्रकरणाची सुरवात 2010 त कर्नाटक लोकायुक्तांच्या तपासातल्यान जाली. तेन्ना बल्लारी सावन बेलकेरी बंदरा मेरेन सुमार 8 लाख टन लोखण खनीज बेकायदेशीर रितीन व्हरतात तें उक्तें जाल्लें. हे संबंदी जायत्या प्रकरणांनी विशेश न्यायालयान सैल आनी हेरांक दोशी थारायिल्लें.
सैल हे उत्तर कन्नड जिल्ह्यांतल्या कारवार विधानसभा मतदारसंघांतले काँग्रेसीचे आमदार आसात. 2024 वर्सा कर्नाटक उच्च न्यायालयान ह्या प्रकरणांत तांकां जाल्ली सात वर्सां बंदखणीची ख्यास्त स्थगीत केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
