भांगरभूंय | प्रतिनिधी
पणजीः भलायकी खातें वा जीएमसी कडल्यान उच्च दर्जाचीं, नवीं आनी म्हत्वाची वखदां उण्या दरांत मेळोवपाक वखदां दर धोरण चालीक लायलां. तें चालीक लावपी गोंय हें पयलें राज्य. भलायकी मंत्री विश्वजीत राणे हांणी बुधवारा पणजेंत जाल्ले कार्यावळींत ही म्हायती दिली. ह्या वेळार खात्याची संचालक डॉ. रूपा नायक, सचीव अरुण कुमार मिश्रा, जीएमसीचे डीन डॉ. जयप्रकाश तिवारी, डॉ. अजय शर्मा आनी प्रशांत वारियार हाजीर आशिल्ले.
गोंयच्या लोकांक बऱ्या दर्जाची भलायकी सेवा आनी उण्या खर्चांत बऱ्या दर्ज्याची उपचार पद्दत दिवपाचो आमी यत्न करतात. हाचोच एक भाग म्हूण वखदां आनी वैजकी उपकरणां उण्या दरांत उपलब्ध करपा खातीर वखदां दर धोरण चालीक लायलें. हाचे वरवीं पेंटट आशिल्लीं म्हत्वाचीं वखदां उण्या दरांत विकतीं मेळटलीं. अशीं वखदां मुखेलपणान कॅन्सर आनी हेर दुर्मिळ दुयेंसां खातीरची आसतलीं अशें मंत्री राणे हांणी सांगलें.
नव्या धोरणाक लागून वखदां आनी हेर उपकरणां खरेदी प्रक्रियेंत पारदर्शकताय येतली. हे खातीर सीएनएसएस खरेदी प्रक्रिया सगळ्यां खातीर उक्ती आसतली. वखदां घेवचे पयलीं बाजारांत त्याच प्रकारचें वखद उण्या दरांत उपलब्ध ना हाची खात्री खात्याचे दोतोर करतले. उण्यांत उण्या दरांत मेळपी वखदूच विकतें घेतले. ते खातीर वखदां कंपनी कडेन सामंजस्य कबलात करतले अशेंय मंत्री राणे हांणी सांगलें.
बेगीन निदान करपा खातीर एआयचो वापर
भलायकी खात्यान फुफ्फुसाच्या कॅन्सराचें निदान करपा खातीर एआय तंत्रज्ञान वापरपाक सुरवात केल्या. एआय वरवीं दोतोरांक कॅन्सराचीं सुरवातेची लक्षणां वळखुपाक सोंपें जालां. बेगीन निदान जाल्ल्यान रोखडोच उपचार सुरू करप लेगीत शक्य जाता अशें राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
